काठमाडौं । रसुवाको त्रिशूली–३ ए जलविद्युत् आयोजनाको सुरुङभित्र फसेका व्यक्तिमध्ये तेस्रो व्यक्तिको पनि उद्धारको तयारी गरिएको छ । उद्धारमा खटिएका सुरक्षाकर्मी तथा प्राविधिक टोलीले सुरुङभित्र रहेका तेस्रो व्यक्तिलाई बाहिर निकाल्ने प्रक्रिया अघि बढेको जनाएको छ ।

उद्धारका लागि आवश्यक अक्सिजन सिलिन्डर तथा अन्य उद्धार सामग्री सुरुङभित्र पुर्‍याइएको छ । सुरुङभित्रको कठिन अवस्थाका कारण उद्धार कार्य चुनौतीपूर्ण बने पनि नेपाली सेनाको नेतृत्वमा संयुक्त टोलीले निरन्तर प्रयास गरिरहेको छ ।

यसअघि सुरुङबाट दुईजनालाई जीवितै उद्धार गरिएको थियो । उद्धार गरिएका दुईमध्ये एकजनाको अवस्था जटिल रहेकाले उनलाई काठमाडौंको छाउनीस्थित वीरेन्द्र सैनिक अस्पतालमा भर्ना गरी सघन उपचार भइरहेको छ ।

प्रधानमन्त्रीको सचिवालयका अनुसार दोस्रोपटक उद्धार गरिएका कबीर महर्जनको अवस्था गम्भीर छ ।

“जटिल अवस्थामा रहनुभएका व्यक्ति दोस्रो पटक उद्धार गरिनुभएका कबीर महर्जन हुनुहुन्छ । उहाँलाई अगाडि नै छाउनी ल्याएर वीरेन्द्र सैनिक अस्पतालमा भर्ना गरी सघन उपचार जारी राखिएको छ,” प्रधानमन्त्रीको सचिवालयले जनाएको छ ।

यसअघि उद्धार गरिएका सञ्जय साहको स्वास्थ्य अवस्था भने सामान्य रहेको बताइएको छ । उनको अवस्था स्थिर देखिए पनि थप स्वास्थ्य परीक्षणका लागि उनलाई पनि छाउनीस्थित वीरेन्द्र सैनिक अस्पताल ल्याउने तयारी गरिएको छ ।

उद्धार कार्यमा नेपाली सेना, नेपाल प्रहरी, सशस्त्र प्रहरी बल तथा विभिन्न प्राविधिक र उद्धार विज्ञहरूको संयुक्त टोली परिचालन गरिएको छ । टोलीले आज बिहानैदेखि सुरुङभित्र रहेका व्यक्तिहरूको उद्धारका लागि काम गरिरहेको छ ।

त्रिशूली–३ ए आयोजनाको सुरुङमा बाढी तथा पहिरोका कारण फसेका व्यक्तिको उद्धारका लागि सुरक्षाकर्मी तथा प्राविधिक टोलीले जोखिमपूर्ण अवस्थामा काम गरिरहेका छन् । तेस्रो व्यक्तिको उद्धार सफल भएपछि घटनामा फसेका अन्य व्यक्तिको अवस्थाबारे थप जानकारी आउने अपेक्षा गरिएको छ ।

Originally published on abcnews.com.np.