काठमाडौं । दक्षिण कोरियाका विदेशमन्त्री चो ह्युन आज नेपाल आउँदै छन्। भोटेकोशी बाढी–पहिरोपछि बेपत्ता भएका कोरियाली नागरिकको खोजी तथा उद्धारमा नेपालसँग सहकार्य र सहयोगका विषयमा छलफल गर्न उनी तीनदिने भ्रमणमा नेपाल आउन लागेका हुन्।

दक्षिण कोरियाको विदेश मन्त्रालयका अनुसार नेपाल भ्रमणका क्रममा चोले परराष्ट्रमन्त्री शिशिर खनालसँग भेटवार्ता गर्नेछन्। उनले बेपत्ता कोरियाली नागरिकका परिवार तथा खोजी तथा उद्धारमा संलग्न आफ्ना देशका कम्पनीका प्रतिनिधिसँग पनि भेट गर्ने कार्यक्रम छ।

भदौ १० गते तिब्बत हुँदै रसुवाको भोटेकोशी नदीमा आएको भीषण बाढीपछि जलविद्युत् आयोजना निर्माणमा कार्यरत नौ जना कोरियाली नागरिक बेपत्ता भएका छन्। बेपत्ता हुनेमा डुसान इनर्जीबिलिटीका छ जना र कोरिया साउथ–इस्ट पावरका तीन जना कर्मचारी छन्।

परराष्ट्रमन्त्री खनालसँगको भेटमा चोले बेपत्ता नागरिकको खोजीलाई थप प्रभावकारी र तीव्र बनाउन नेपाल सरकारसँग सहयोग माग्ने बताइएको छ। साथै बाढी–पहिरो प्रभावित क्षेत्रको पुनःस्थापना तथा पुनर्निर्माणमा सहयोग र नेपाल–दक्षिण कोरिया सम्बन्धका अन्य विषयमा पनि छलफल हुने जनाइएको छ।

नेपालमा परिचालित कोरिया डिजास्टर रिलिफ टिम (केडीआरटी) लाई चोले घटनास्थलमै पुगेर भेट्ने कार्यक्रमसमेत छ। केडीआरटीले नेपाली सुरक्षाकर्मी तथा सम्बन्धित कम्पनीका उद्धार टोलीसँग सहकार्य गर्दै हेलिकोप्टर, ड्रोन, खोजी कुकुर र थर्मल इमेजिङसहितका उपकरण प्रयोग गरेर बेपत्ताको खोजी गरिरहेको छ।

नेपाल भ्रमण पूरा गरेपछि दक्षिण कोरियाली विदेशमन्त्री चो फ्रान्स जानेछन्।

Originally published on abcnews.com.np.