काठमाडौं । एसीसी प्रिमियर कपमा साउदी अरेबियाले नेपालसामु १९१ रनको लक्ष्य प्रस्तुत गरेको छ।

मलेसियाको बायोमास ओभलमा टस जितेर पहिले ब्याटिङ गरेको साउदीले ४९.२ ओभरमा सबै विकेट गुमाउँदै १९० रन बनाएको हो।

साउदीका लागि अब्दुल वाहिदले सर्वाधिक ७७ रन बनाए। उनले ८९ बलमा १० चौका र दुई छक्का प्रहार गरे। यस्तै, मोहम्मद अतिफले ३०, मोहम्मद हसिम शेखले २८ तथा जैनुल अबिदिनले १२ रनको योगदान दिए।

दोस्रो विकेटका लागि वाहिद र अतिफबीच ९४ रनको महत्वपूर्ण साझेदारी भएको थियो।

नेपालका लागि कप्तान सन्दीप लामिछाने र दीपेन्द्रसिंह ऐरीले समान तीन विकेट लिए। ललितनारायण राजवंशीले दुई तथा शेर मल्ल र गुल्सनकुमार झाले एक–एक विकेट हात पारे।

अब नेपालले १९१ रनको लक्ष्य पछ्याउनेछ। नेपाल लगातार तेस्रो जित निकाल्दै एक खेल अगावै सेमिफाइनलमा स्थान सुरक्षित गर्ने लक्ष्यमा छ। नेपालले यसअघि बहराइन र मलेसियालाई पराजित गरेको थियो।

यता, प्रतियोगितामा आफ्नो चौथो खेल खेलिरहेको साउदी पनि सुखद अन्त्यको खोजीमा छ। हङकङ र मलेसियासँग पराजित भएको साउदीले बहराइनलाई भने हराएको थियो।

Originally published on abcnews.com.np.