काठमाडौं । नेपाल ‘ए’ले अस्ट्रेलियामा भएको एकदिवसीय अभ्यास शृंखला जितविहीन हुँदै टुंग्याएको छ।

आइतबार सम्पन्न तेस्रो तथा अन्तिम खेलमा नेपाल ‘ए’ न्युजिल्यान्ड ‘ए’सँग २ विकेटले पराजित भएको हो। यसअघि नेपाल तास्मानिया र साउथ अस्ट्रेलियासँग पनि पराजित भएको थियो।

नेपालले दिएको २१२ रनको लक्ष्य न्युजिल्यान्ड ‘ए’ले एक बल बाँकी रहँदा ८ विकेट गुमाएर पूरा गर्‍यो।

न्युजिल्यान्डको जितमा रिस मरियुले उत्कृष्ट ब्याटिङ गर्दै १३७ रन बनाए। उनले १३४ बलमा १६ चौका र तीन छक्का प्रहार गरे। यस्तै, म्याट फिशरले अविजित २३, मोहम्मद अब्बासले २१ तथा म्याथ्यु बोयलले ११ रन जोडे।

नेपालका लागि युवराज खत्री, रिजन ढकाल र साहब आलमले समान दुई–दुई विकेट लिए। विपिन खत्री र पवन सराफले एक–एक विकेट हात पारे।

त्यसअघि टस जितेर पहिले ब्याटिङ गरेको नेपालले निर्धारित ५० ओभरमा सबै विकेट गुमाउँदै २११ रन बनाएको थियो।

नेपालका लागि पवन सराफले सर्वाधिक ६१ रन बनाए। उनले ९२ बलमा ६ चौका प्रहार गरे। लोकेश बमले ४७, कप्तान अनिलकुमार साहले २४, मयन यादवले २० तथा विपिन खत्रीले १२ रनको योगदान दिए।

न्युजिल्यान्ड ‘ए’का म्याट फिशरले सर्वाधिक चार विकेट लिए। क्रिस्टियन क्लार्क र आदित्य अशोकले दुई–दुई तथा जेक गिब्सन र मोहम्मद अब्बासले एक–एक विकेट लिए।

यससँगै नेपाल ‘ए’ले अस्ट्रेलिया भ्रमणमा खेलेका तीनवटै अभ्यास खेलमा हार व्यहोर्दै शृंखला समाप्त गरेको छ।

Originally published on abcnews.com.np.