सप्तरी, ३ कात्तिक । राजविराजस्थित गजेन्द्र नारायण सिंह सगरमाथा अंचल अस्पतालमा विगत तीन दिनदेखी एक महिला र एक बृद्धको शव अलपत्र अवस्थामा रहेको छ ।

तीन दिन अघि सप्तकोशी नदी किनारमा अन्दाजी ५० वर्षिया एक महिला मृत अवस्थामा फेला परेको थियो । कोही आफन्त सनाखत गर्न नआएपछि दुबै शव अलपत्र परेको हो ।

प्रहरीले घटनास्थलमा मधेशी मूलकी देखिने महिलाको शवको सरजमिन मुचुल्का बनाएर पोष्टमार्टमका लागि अस्पताल पु¥याएका थिए ।त्यस्तै सोही दिन पूर्वपश्चिम राजमार्ग अन्तगत सप्तरीको कल्याणपुर सडक खण्डमा गम्भिर घाइते भएको अवस्थामा फेला परि उपचारको क्रममा मृत्यु भएका अन्दाजी ६० वर्षिय एक बृद्धको शव पनि पोष्टमार्टम कक्षमा वेवारिसे अवस्थामा छन् ।

तीन दिनदेखी कोही आफन्त नआए पनि उनलाई मानविय संवेदनशिलताका कारण अस्पतालका चिकित्सक र नर्सले निशुल्क उपचार गरेका थिए । शवले अस्पताल दुर्घन्धित हुन नदिन पोष्टमार्टम र आवश्यक कानुनी प्रक्रिया पुरा गरि अन्तिम संस्कार गराउने तयारी सुरु गरिएको जिल्ला प्रहरी कार्यालय सप्तरीले जनाएको छ ।

यसैबीच पानी तान्ने मोटर चलाउने क्रममा करेन्ट लागेर शनिबार एक बालकको ज्यान गएको छ । आफ्नै फुलवारीमा पानी लगाउने क्रममा मोटर चलाउँदा करेन्ट लागेर सप्तरीको राजगढ गाउँपालिका ३ कट्टी गाउँ बस्ने १४ वर्षिय बालक उमेश कुमार साहको ज्यान गएको हो ।

करेन्ट लागेर गम्भिर घाइते भएका उनलाई उपचारका लागि गजेन्द्र नारायण सिंह सगरमाथा अंचल अस्पताल पु¥याइएको थियो । तर, अस्पताल ल्याउनु पूर्व नै उनको मृत्यु भइसकेको डा. सुभाष चौधरीले जानकारी दिए ।