काठमाडौं, ८ फागुन । प्रस्तावित लगानी सम्मेलनका अधिकतम विदेशी लगानी भित्र्याउन अर्थमन्त्री डा. युवराज खतिवडा गएराति ११ बजे बेलायतको लण्डन प्रस्थान गर्नुभएको छ ।

लण्डन बसाईका क्रममा अर्थमन्त्री खतिवडाले नेपाली राजदूतावासले आयोजना गर्ने नेपाल विकास सम्मेलनमा प्रमुख वक्ताको रुपमा सम्बोधन गर्ने कार्यक्रम छ । नेपाल विकास सम्मेलनमा बेलायका लगानीकर्तालाई आमन्त्रण गरिएको छ । त्यसैगरी मन्त्री खतिवडाले बेलायतस्थित गैर आवासीय नेपालीका प्रतिनिधि तथा नेपाल–बेलायत चेम्बर अफ कमर्सले आयोजना गर्ने विकास तथा लगानीसंग सम्बन्धित कार्यक्रममा पनि नेपालमा लगानीको संभावनाबारे जानकारी गराउनु हुनेछ ।

नेपालले आयोजना गर्न लागेको लगानी सम्मेलनका विषयमा त्यहाँका लगानीकर्तासंग अन्तरक्रिया गर्ने कार्यक्रम रहेको अर्थमन्त्रालयका उपसचिव होमकान्त भण्डारीले जानकारी दिनुभयो । चैत १५ र १६ गते आयोजना हुन लागेको लगानी सम्मेलनमा अधिकतम विदेशी लगानीकर्ता आकर्षित गर्न सरकारले लगानीकर्तालाई कन्भिन्स गर्ने कोशिश गरिरहेको छ । अधिकतम लगानीको प्रतिवद्धता भित्राउने र त्यसलाई वास्तविक लगानीमा परिणत गर्न खतिवडाले जोड दिनुभएको हो ।