काठमाण्डौं, ३० असोज । आइतबारको आम चुनाव जितेपछि अष्ट्रियाको कन्जरभेटिभ पिपल्स पार्टीका प्रमुख जेबास्टियन कुर्ट्स विश्वकै सबैभन्दा कान्छा नेता हुन लागेका हुन् ।

३१ वर्षीय कुर्ट्सको पार्टीले बहुमत नल्याए पनि अब नयाँ गठबन्धनको सरकार बनाउनका लागि बलियो स्थान छ । कुर्ट्सले नेतृत्व गरेको अष्ट्रियाको कन्जरभेटिभ पिपल्स पार्टीले देशको आम चुनाव जित्न लागेको मत सर्वेक्षणहरुले देखाएका छन् । पूर्व विदेशमन्त्री रहेका कुर्ट्सले शिथिल भइसकेको कन्जरभेटिभ पिपल्स पार्टीको नेतृत्व गत मे महिनामा सम्हालेपछि त्यसलाई पूनर्जीवन दिएको भियनास्थित बिबीसी संवाददाताले बताएका छन् । उनले आप्रवासनप्रति कडा नीति लिने बाचा गरेका थिए । चुनावमा बलियो मतसहित तेस्रो भएको आप्रवासन नीति विरोधी फ्रिडम पार्टीसंग गठबन्धन गर्लान् कि नगर्लान् भन्ने स्पष्ट भइसकेको छैन । मत सर्वेक्षणहरुले पिपल्स पार्टीले ३१ प्रतिशत भन्दा बढी मत ल्याउने देखाएका छन् । दोस्रो स्थानमा सोसियल डेमोक्र्याट्स आउँछ वा चरम दक्षिणपन्थी फ्रिडम पार्टी आउछ भन्ने अझै स्पष्ट भइसकेको छैन ।