जुनदेखि जुलाईसम्म अस्ट्रेलियामा रोजगारीमा रहेका व्यक्तिको संख्या १५ हजार ८०० ले घटेको छ भने बेरोजगारको संख्या ४ हजार २०० ले बढेको एबीएसले जनाएको छ। पछिल्लो तथ्यांकले अस्ट्रेलियाको श्रम बजारमा केही दबाब बढेको संकेत गरेको छ।

एबीएसका श्रम तथ्यांक प्रमुख सिन क्रिकका अनुसार जुलाईमा पुरुषको रोजगारी ११ हजार र महिलाको रोजगारी पाँच हजारले घटेको थियो। यद्यपि, महिलाको पूर्णकालीन रोजगारी १७ हजारले बढेको छ भने आंशिक समयको रोजगारी २२ हजारले घटेको उनले बताए।

सन् २०२१ यताकै उच्च बेरोजगारी

जुलाईमा कायम भएको ४.५ प्रतिशत बेरोजगारी दर सन् २०२१ को नोभेम्बरपछि कै उच्च हो।

यस अवधिमा अस्ट्रेलियामा कामदारले गरेको कुल कामको समय ०.६ प्रतिशतले घटेर एक अर्ब ९९ करोड घण्टामा सीमित भएको एबीएसले जनाएको छ।

त्यस्तै, श्रमशक्ति सहभागिता दर पनि जुन महिनाको ६७ प्रतिशतबाट घटेर जुलाईमा ६६.९ प्रतिशतमा झरेको छ।

एबीएसका अनुसार महिला रोजगारीमा आंशिक र पूर्णकालीन कामबीच फरक प्रवृत्ति देखिएको छ। आंशिक समयको रोजगारी घटे पनि पूर्णकालीन रोजगारी बढेकाले श्रम बजारको समग्र अवस्था मूल्यांकन गर्दा दुवै पक्षलाई हेर्नुपर्ने क्रिकले बताएका छन्।