काठमाडौं । क्यामरुनको सीमासँग जोडिएको सेन्ट्रल अफ्रिकन रिपब्लिकको पश्चिमी क्षेत्रमा रहेको एक सुनखानीमा पहिरो जाँदा कम्तीमा १०७ जनाको मृत्यु भएको छ ।

स्थानीय अधिकारीका अनुसार क्यामरुनसँग सीमा जोडिएको गरुआ–बुलाई क्षेत्रमा मंगलबार दिउँसो खानीको एक भाग भत्किएर पहिरो गएको हो । घटनापछि उद्धार तथा राहत कार्य जारी रहेको छ ।

घटनापछि सार्वजनिक भएका भिडियोमा खानीको एउटा भाग मानिसहरूमाथि खसेको र केही व्यक्ति ज्यान जोगाउन भागिरहेको देखिन्छ ।

गरुआ–बुलाईका मेयर अदमो अब्दोनले बीबीसीलाई दिएको जानकारीअनुसार हालसम्म मलबाबाट १०७ जनाको शव निकालिएको छ । पहिरोमा थप मानिस पुरिएको हुन सक्ने भएकाले मृतकको संख्या अझै बढ्न सक्ने अधिकारीहरूले बताएका छन् ।

दुर्घटनामा बाँच्न सफल एक खानी श्रमिक सेड्रिक मबांगोले जमिन पूर्ण रूपमा धसिएको र धेरै मानिस भग्नावशेषमा पुरिएको बताएका छन् ।

क्यामरुनको इस्ट रिजनका गभर्नरका अनुसार मृत्यु हुनेमध्ये कम्तीमा तीनजना क्यामरुनका नागरिक रहेका छन् । घटनाको कारण पत्ता लगाउन स्थानीय अधिकारीहरूले अनुसन्धान सुरु गरेका छन् ।

जोखिमपूर्ण खानी कार्य

घटना भएको क्षेत्रमा साना स्तरमा परम्परागत विधिबाट गरिने खनन धेरै परिवारको आम्दानीको प्रमुख स्रोत हो । तर, खानीमा काम गर्ने अवस्था अत्यन्त जोखिमपूर्ण रहेको बताइएको छ ।

खानी धसिने तथा पहिरो जाने घटना यस क्षेत्रमा पटक–पटक हुने गरेका छन् । उद्धार कार्य जारी रहेकाले घटनामा थप मानवीय क्षति हुन सक्ने अधिकारीहरूले आशंका गरेका छन् ।

Originally published on abcnews.com.np.