काठमाडौं, २७ पुस  ।  युक्रेनको विमान दुर्घटनालाई लक्षित गरी आक्रमण गरिएकोबारे लुकाएर ‘झुठो’ बोलेको भन्दै सयौँ इरानी जनता प्रदर्शनमा उत्रेका छन्।

प्रदर्शनकारीहरूले शारिफ र आमिर कबीर विश्वविद्यालयअगाडि प्रदर्शन गरेका हुन्। ‘झुठो बोल्नेहरू मुर्दावाद’ भन्दै प्रदर्शनकारीहरूले विरोध गरेका हुन्। उनीहरूले प्रधान सेनापतिको राजीनामा समेत माग गरेका छन्।

सामाजिक सञ्जालमार्फत् पनि यसरी आक्रोश पोखिएका छन्। एकजनाले ट्वीटरमा लेखेका छन्, ‘म मेरा देशका अधिकारीहरूलाई कहिल्यै क्षमा गर्दिनँ, जो ठाउँमा छन् र अझ झुठो बोल्छन्।’ इरानले शनिबार ‘भुलवश’ भएको भन्दै उक्त विमान दुर्घटनाको जिम्मेवारी लिएको थियो। युक्रेनको केभतर्फ जाँदै गरेको युक्रेन इन्टरनेसनल एयरलाइन्स पीएस ७५२ लाई बुधबार इरानले आफ्नो संवेदनशील क्षेत्रतर्फ आएको भन्दै प्रहार गरेको थियो। इराकस्थित दुई अमेरिकी हवाइ शिविरमा इरानले गरेको आक्रमणको केहीपछि उक्त विमानमा प्रहार गरिएको थियो।