काठमाडौं, ३१ जेठ । जनता समाजवादी पार्टी नेपालका नेता राजेन्द्र महतोले आजको दिन नेपालको लागि ऐतिहासिक दिन रहेको बताउनुभएको छ ।

उहाँले देशको भूमि संविधानमा लेखाउने कुरा अति नै खुसीको कुरा रहेको र यो देशको सार्वभौमसत्ता र अखण्डताको पक्षमा एकजुट हुने दिन रहेको पनि बताउनुभयो । जसपाका नेता महतोले सबै नेपाली जनता आफ्नो देश र भूमिप्रति सजग र संवेदनशील रहेको र यो कुरा संसदमा कामबाट देखिनुपर्ने बताउनुभयो । उहाँले राष्ट्रियताको सवालमा देश एकजुट हुने भए पनि आफूहरुलाई हेर्ने दृष्टिकोण फरक रहेकोमा भने आपत्ति जनाउनुभयो ।

नेपालको भूमि समेटेर नयाँ नक्सा संविधानमै राख्नको लागि प्रस्ताव आएको र आफ्नो दलले सहमति दिइसकेको उहाँले बताउनुभयो ।
संविधानका धेरै कुरामा आफूहरुको गम्भीर असहमति रहेको तर राष्ट्रिय अखण्डता र सार्वभौमसत्ताको मामिलामा आफूहरु दायाँबायाँ नहुने महतोको भनाइ छ ।

नेता महतोले नक्सामात्रै बनाउनेभन्दा पनि भूमि फिर्ता लिन प्रधानमन्त्री केपी शर्मा ओलीलाई सुझाव समेत दिनुभयो । उहाँले संविधानमा कैयौँ असन्तुष्टि हुँदा हुँदै पनि राष्ट्रियता र भूमिको सवाल उठेकोले सबै असन्तुष्टिलाई थाती राखेर जसपाले सर्वसम्मतीले समर्थन गरेको बताउनुभयो । नेता महतोले महाकाली सन्धि गर्नु गम्भीर गल्ती भएको बताउनुभयो ।

महाकाली सन्धिले नै महाकाली नदीको स्रोत छुट्याएको भन्दै नेता महतोले महाकाली सम्झौता राष्ट्रघाती सम्झौता भएको बताउनुभयो । सन्धी गर्नेहरुलाई कारबाही गर्न नेता महतोले माग गर्नुभयो । मधेशी समुदायलाई राष्ट्रघाती भनेर जहिल्यै हेप्ने गरेकोमा उहाँले गुनासो गर्नुभयो ।