काठमाडौं, ८ भदौ । दक्षिण अमेरिकी मुलुक पेरुको राजधानी लिमास्थित एउटा नाइट क्लबमा प्रहरीले हस्तक्षेप गरेपछि भएको भागदौडमा कम्तिमा १३ जनाको ज्यान गएको छ । उनीहरुमध्ये दुई महिला र ११ पुरुष छन् ।

मृतकहरुको उमेर २० देखि ३० वर्ष छ । विश्व महामारी कोरोनाका कारण त्यहाँको सरकारले लिमासहित देशभर गत मार्चदेखि नै रात्रिकालिन व्यवसाय नाइट क्लब, डिस्को र डान्सबारमाथि प्रतिबन्ध लगाएको छ । तर, प्रतिबन्ध उल्लंघन गर्दै थोमस रेष्ट्रोबार नामको नाइट क्लब सञ्चालनमा आएको सूचना पाएपछि प्रहरीले छापा मारेको थियो ।

त्यस क्रममा प्रहरीले अरु २३ जनालाई नियन्त्रणमा लिएको छ । पक्राउ परेका मध्ये १५ जनामा कोरोना भाइरस पोजेटिभ देखिएको छ । पेरु कोरोना अतिप्रभावित मुलुकमध्ये एक हो । त्यहाँ हालसम्म २७ हजारले कोरोनाबाट ज्यान गुमाएका छन् । अरु झण्डै ६ लाख मानिस संक्रमित छन् ।