काठमाडौं, ३० भदौ । चीनको अर्थतन्त्रमा सकारात्मक वृद्धि भएको पाइएको छ । कोरोना भाइरसका कारण विश्वकै अर्थतन्त्र ऋणात्मक बन्दै गएको बेला चीनको अर्थतन्त्र भने सकारात्मक बनेको हो । कोरोना भाइरसको उद्गमथलो मानिने चीनमा अहिले संक्रमण खासै फैलिएको छैन भने अगस्टमा चीनको निर्यात लगातार बृद्धि भइरहेको छ ।

अगस्टमा भएको निर्यात अघिल्लो वर्षको तुलनामा ५.५ प्रतिशतले वृद्धि भएको हो । मार्च २०१९ देखि चीनले निर्यातमा लगातार बृद्धि गरिरहेको छ । विश्लेषकहरुले अनुमान गरेभन्दा बढी बृद्धि भएको चिनियाँ भन्सारको तथ्यांकले देखाउछ ।

आयात भने २।१ प्रतिशतले गिरावट आएको भएपनि बजारको अपेक्षाको तुलनामा १ प्रतिशतको बृद्धि हो । विश्वकै दोश्रो ठूलो अर्थतन्त्र भएको चीनको अर्थतन्त्र कोरोनाका कारण पहिलो तीन महिना ध्वस्त नै भएको थियो । चीनले आफ्नो व्यापार व्यवशाय पुन शुरु गरेदेखि नै अन्तर्राष्ट्रिय जगतको ध्यान चीनको जिडिपिमा केन्द्रीत रहँदै आएको छ ।