काठमाडौं, ७ पुस । प्रचण्ड–माधव समूहको केन्द्रीय कमिटी बैठकले नेपाल कम्युनिष्ट पार्टी (नेकपा) को अध्यक्षमा माधवकुमार नेपाललाई चयन गरेको छ । बबरमहलस्थित कार्की ब्याङक्वेटमा भएको बैठकले वरिष्ठ नेता झलनाथ खनालको प्रस्तावमा नेपाललाई अध्यक्ष चयन गरेको हो । प्रधानमन्त्री तथा अर्का अध्यक्ष केपी शर्मा ओलीलाई पार्टी आचरण र संविधान विपरित काम गरेको भन्दै अध्यक्षबाट हटाउने निर्णय गरेसगै खाली रहेको पदमा नेपाललाई अध्यक्ष बनाइएको केन्द्रीय सदस्यले हिमाल शर्मा जानकारी दिनुभयो ।

बैठकले पुस ५ गते भएको संसद विघटन गर्ने सरकारको निर्णयलाई असंवैधानिक, अलोकतान्त्रिक, निरंकुश, प्रतिगामी र स्वच्छेचारी ठहर्दै भत्र्सना गरेको छ । साथै बैठकले अबिलम्ब संसदको कार्य सञ्चालन गर्न तथा  निर्णयको विरुद्धमा संघर्ष गर्ने घोषणा पनि गरेको छ ।

बैठकले स्थायी समितिमा रिक्त रहेको स्थानमा कृष्ण बहादुर महरालाई नियुक्त गर्ने स्थायी समितिको बैठकको निर्णयलाई सर्वसम्मति अनुमोदन पनि गरेको छ । बैठकमा पार्टीको आन्तरिक समस्या र समाधानका बारेमा स्थायी कमिटीका बैठकमा अध्यक्ष पुष्पकमल दाहाल प्रचण्डबाट प्रस्तुत प्रस्तावहरु अध्ययनका लागि केन्द्रीय सदस्यहरुलाई वितरण गरिएको छ । त्यसैगरी बैठकमा अध्यक्ष प्रचण्ड, वरिष्ठ नेता झलनाथ खनाल र माधव कुमार नेपालले पार्टीको आन्तरिक जीवन र पछिल्लो राजनीतिक घटनाक्रमका बारेमा जानकारी गराउनुभएको थियो ।

अध्यक्ष प्रचण्डले पार्टी भनेको विचार र विधि भएको स्पष्ट पार्दै पार्टी एकताको मर्म अनुसार आधिकारीक प्रतिनिधित्व रहेकाले वास्तविक प्रतिनिधित्व तर्फ एकिकृत हुन आव्हान गर्नुभयो । अध्यक्ष प्रचण्डले वर्तमान परिस्थितिका बारेमा पुरा गर्नुपर्ने कार्यबारे पनि सदस्यहरुलाई दिशानिर्देश गर्नुभएको पार्टी प्रवक्ता श्रेष्ठले बताउनुभयो ।

त्यस्तै नेकपाका बरिष्ठ नेता झलनाथ खनालले पार्टी एकता र कम्युनिष्ट आन्दोलन बारे स्पष्ट पार्दै भ्रममा परेका सबैलाई एकीकृत पार्टीको पक्षमा उभिन आव्हान गर्नुभयो ।  यस समुहको अर्को केन्द्रीय समिति बैठक विहिबार बिहान साढे ११ बजेका लागि बोलाईएको छ ।