काठमाडौ, १२ असार । ईस्लाम धर्मावलम्बीहरुको महान पर्व ईद–उल–फित्र आज देशभर धुमधामका साथ मनाइँदैछ ।
आत्मसंयम र शुद्धिका लागि एक महिनासम्म मनाइने रमजान पर्वको रोजा (ब्रत) सकिएको भोलिपल्ट यो पर्व मनाउने गरिन्छ । विश्वभरका ईस्लाम धर्मावलम्बी मुसलमानहरु एक महिनासम्म रोजा बस्दछन् । आइतबार बेलुका चन्द्रमा देखिएपछि ईस्लामिक पात्रो अनुसार रमजान महिनामा एक महिना रोजा (ब्रत) पुरा गरी ईद मनाउने चलन छ । रमजान महिना सकिएलगत्तै ‘रोजा’ सकिने र ईदगाहको मस्जिदमा सामुहिक रुपमा प्रार्थना गरी शुभकामना साटासाट समेत गर्ने चलन छ ।
रोजा सूर्योदय हुनुअघिदेखि सूर्यास्तसम्म चल्ने र यस महिनामा धनी वर्गले गरीबलाई आर्थिक सहयोगलगायत अन्य दान दिने चलन रहँदै आएको छ । यसैबीच, राष्ट्रपति विद्यादेवी भण्डारीले इस्लाम धर्मावलम्बीको पर्व इद इदुल फित्रका अवसरमा स्वदेश तथा विदेशमा रहेका समस्त नेपाली इस्लाम धर्मावलम्बी दिदीबहिनी तथा दाजुभाइमा सुख, शान्ति र समृद्धिका लागि शुभकामना दिनुभएको छ । राष्ट्रपतिले शुभकामना सन्देश जारी गर्दै देशभित्र बसोबास गर्ने विभिन्न जातजाति, भाषाभाषी र समुदायबीच आपसी मेलमिलाप, सद्भाव र भाइचाराको प्रवद्र्धन गर्ने विश्वास व्यक्त गर्नुभएको हो । इद उल फित्र कै अवसरमा प्रधानमन्त्री शेरबहादुर देउवा, राष्ट्रपति विद्यादेवी भण्डारी, माओवादी केन्द्रका अध्यक्ष पुष्पकमल दाहाल प्रचण्ड, नेकपा–एमाले अध्यक्ष केपी शर्मा ओली, नया“ शक्ति पार्टीका संयोजक डाक्टर बाबुराम भट्टराईलगायतका अन्य दलका नेताहरुले शुभकामना दिनुभएको छ । यसैबीच सरकारले इस्लाम समुदायको पर्व ईदको अवसरमा आज सार्वजनिक बिदासमेत दिएको छ ।