काठमाडौं, १७ पुस ।एक मात्र प्रतिनिधीसभा र दुई ओटा प्रदेशसभा रहेको संखुवासभा जिल्लामा प्रतिनिधिसभा तर्फको मतगणना एक पक्षीय ढंगबाट गरेको आरोप लगाउदै सर्वोच्चमा उजुरी परेको थियो । नेपाली सेनाको हेलिकप्टरबाट मतपत्र, मुचुल्का लगायत सम्पूर्ण निर्वाचन सामग्रीहरु काठमाडौ ल्याईएको हो ।

संखुवासभा जिल्लाको प्रतिनिधिसभा तर्फ नेपाली काग्रेसका उम्मेदवार दिपक खड्काले पुष ३ गते सर्वोच्च अदालतमा पुनः मतगणनाको माग गर्दै निवेदन दर्ता गराएका गराउनु भएको थियो । पुस ७ गते सर्वोच्च अदालतमा बादीप्रतिबादी बीच छलफल भएको थियो । त्यसपछि १४ गतेको पुनः छलफलले जिल्ला निर्वाचन कार्यालय संखुवासभालाई मतपत्र र मुचुल्का सहित निर्वाचनका सामग्रीहरु निर्वाचन आयोगको कार्यालय काठमाडौमा तत्कालै पठाउन सर्वोच्च अदालतले आदेश दिएको थियो । सर्वोच्च अदालतको आदेश अनुसार मतपत्र काठमाडौ पठाईएको प्रमुख जिल्ला अधिकारी शिवराज जोशीले बताउनुभयो ।

सर्बोच्च अदालतको आदेश अनुसार जिल्लाका कृयाशिल राजनैतिकदलका प्रतिनिधिहरुको रोहवरमा मतपत्र लगायतका सम्पूर्ण निर्वाचन सामग्रीहरु पठाइएको हो । प्रतिनिधिसभा उम्मेवार दिपक खड्काले मतगणनाको क्रममा निर्वाचनमा खटिएका कर्मचारीहरुले पक्षपाति गरेको, बदर मतको संख्या बढि देखाएको र मत गणनामा काँग्रेसको प्रतिनिधि नहुदाँ पनि निर्वाचन अधिकृतले एक पक्षीय ढंगबाट मतगणना गरेको आरोप लगाउदै आउनु भएको थियो ।

संखुवासभा जिल्लामा प्रतिनिधिसभा तर्फ ६९ हजार २ सय ४६ मत खसेकोमा ३ हजार २ सय ५६ मत बदर भएको थियो । प्रतिनिधिसभा तर्फ नेकपा एमालेका उम्मेदवार राजेन्द्र गौतमले ३२ हजार ७ सय ६९ मत प्राप्त गरि बिजयी भएका थिए भने उनको निकटतम प्रतिद्धन्द्धि नेपाली काँग्रेसका उम्मेदवार दिपक खड्काले ३१ हजार ६ सय ३९ मत प्राप्त गरेको थिए । गौतमले खडकालाई १ हजार १ सय ३० मतअन्तरले पराजित गर्नु भएको थियो ।