सिन्धुली, २९ पुस । सिन्धुलीको गोलञ्जोर गाउँपालिका ४ सौरेनीका सनमान थिङको घर दशैंको अघि आगलागीबाट ध्वस्त भयो । भूकम्पबाटको अनुदान रकमसमेत सोही आगलागीमा परेर जल्यो । उनीसँग सम्पत्तिको नाममा जग्गाजमिन मात्र बाँकी रह्यो । उनीसँग घर बनाउनका लागि पैसा भएन । समस्या सबैतिर पोखे तर कुनै साथ सहयोग पाएनन् ।

आगलागी भएको भोलिपल्ट वरिष्ठ समाजसेवी उज्वल थापाको पहलामा जस्तापाता, लत्ताकपडा र खाद्यान्न प्राप्त भएको थियो । त्यसपछि सामान्य सहयोगबाहेक अरु जुट्न सकेन् ।

घर बनाउनका लागि प्राप्त गरेको रकमसमेत आगजनीमा परेपछि थिङ निकै समस्यामा थिए । शनिवारको बिहान एबीसी न्यूज टेलिभिजनका समाचार संयोजक डण्ड गुरुङको पहलमा संकलित ४६ हजार रुपैयाँ पाएपछि थिङका लागि केही राहत मिलेको छ ।

रकम सहयोग पाउने कुनै आश नै नगरेको बताउँदै थिङले ४६ हजार रुपैयाँले घर बनाउन केही सहज हुने बताए । उनले घर बनाउनका लागि कम्तिमा ४ लाख लाग्ने पनि सुनाए ।

पत्रकार गुरुङ स्वयमले प्रेस काउन्सीलबाट प्राप्त रकममध्ये ५ हजार रुपैयाँ दिएर सहयोग अभियान सञ्चालन गरेका थिए । त्यस्तै, सोही अभियानमा मलेसियामा रहेका लमजुङका सौगात तामाङले १३ हजार ४४९ रुपैयाँ, दोलखा घर भई नेदरल्याण्ड रहेका सुनिल गुरुङले सात हजार रुपैयाँ पठाएका थिए ।

त्यसैगरी, सोही अभियानमा दोहा कतारबाट सिन्धुली सेवा समाज लगायत विभिन्न व्यक्तित्वहरुले २० हजार ५०५ रुपैयाँ जम्मा गरेको थियो । सो सहयोगका लागि तीनकन्याकै निर्मल ठकुरीको विशेष पहल थियो ।

त्यस्तै, इजरायलमा रहेका समाजसेवी शरिन ख्युङ्वा तामाङले समेत सहयोग गर्ने बचन दिएको अभियानकर्ता गुरुङले जानकारी गराए ।

सहयोग रकम हस्तान्तरणपछि थिङले सबै सहयोगीलाई धन्यवाद दिएका छन् । अभियान सञ्चालन गर्ने पत्रकार गुरुङले अभियान जारी रहेको जानकारी दिएका छन् ।