काठमाडौं । अमेरिकाको एडफोर्ड अन्तर्राष्ट्रिय फिल्म महोत्सवमा नेपाली डकुमेन्ट्री फिल्म छनोट भएको छ ।
चर्चित डकुमेन्ट्री फिल्म निर्देशक गणेश पाण्डेले खुशीको सन्देश भन्दै, उहाँ निर्देशित ‘सहायक श्रीमान’ (को–हजबेन्ड) डकुमेन्ट्री फिल्म (बृत्तचित्र) एडफोर्ड अन्तर्राष्ट्रिय फिल्म महोत्सवमा छनोट भएको जानकारी दिनुभयो ।
‘सहायक श्रीमान’ (को–हजबेन्ड) बृत्तचित्रले नेपाल अन्तर्राष्ट्रिय चलचित्र महोत्सवमा उत्कृष्ट अवार्ड जित्न सफल भएको थियो ।
साथै यो डकुमेन्ट्री फिल्मले यसअघि रसिया, भारत र स्लोभाकियामा पुरस्कार जितिसकेको छ । अमेरिका, जर्मनी, श्रीलंका लगायतका देशमा छनौट भएको छ ।
३५ मिनेटको यो बृत्तचित्र कर्णाली प्रदेशको हुम्लामा छायाँकन गरिएको हो । घरमा जति दाजुभाई छन्, एउटै श्रीमती बिहे गर्ने चलनलाई निर्देशक पाण्डेले पर्दामा उर्तानुभएको छ ।
हुम्लाको लामा समुदायमा अहिले पनि दाजुभाईका लागि एउटै श्रीमती बिहे गर्ने चलन छ । एउटै श्रीमतीसँग रमाइरहेका र विद्रोह गरेका तीन वटा परिवारको कथालाई डकुमेन्ट्रीले उठाएको छ ।
साइन मिडिया प्रालिका लागि शारदा गैरेले निर्माण गरेको डकुमेन्ट्रीको प्रमुख सहायक निर्देशक एवं दृश्य सम्पादक ईश्वर कोइराला र सहायक निर्देशक नृपराज हमाल हुनुहुन्छ ।
यसैगरी, ईश्वर कोइराला, चन्द्रमान डंगोल, अविनाश लामा र राधेश्याम तिमिल्सिनाले यो डकुमेन्ट्रीलाई क्यामरामा कैद गर्नुभएको छ । संगीत संयोजन संगीतकार जुगल डंगोलको रहेको छ ।
पाण्डे नेपालको चर्चित र क्रियाशील पत्रकार हुनुहुन्छ । उहाँ प्रेस चौतारी नेपालको उपाध्यक्षको रुपमा अहिलेपनि कार्यरत हुनुहुन्छ । नेकपा (एमाले) का अध्यक्ष केपी शर्मा ओली नेतृत्वको सरकारमा उपप्रधानमन्त्री ईश्वर पोखरेलको प्रेस सल्लाहकारको रुपमा उहाँले जिम्मेवारी पाउनुभएको थियो ।
