काठमाडौँ, १२ माघ । नेकपा (एमाले)का अध्यक्ष केपी शर्मा ओलीले सरकार ढाल्ने प्रयास भइरहेको बताएका छन् । अध्यक्ष ओलीले नेपाली कांग्रेसप्रति संकेत गर्दै सरकारमा नहुनको ध्यान सरकार ढाल्नेतर्फ गइरहेको बताएका हुन् ।

बुधबार ललितपुरको च्यासलस्थित पार्टी केन्द्रीय कार्यालयमा नेपाल आयुर्वेद स्वास्थ्यकर्मी समाजको पाँचौँ राष्ट्रिय महाधिवेशनको उद्घाटन समारोहमा बोल्दै उनले सरकार ढाल्ने र टिकाउने खेलभन्दा माथि उठेर देशको हितका लागि ‘डेमोक्रेटिक एक्सरसाइज’ गर्न पनि सबै राजनीतिक दलहरूलाई आग्रह गरे ।

ओलीले मुलुकको राजनीतिलाई ठिक बाटोमा अघि बढाउन आफूहरूले कोसिस गरिरहेको दाबीसमेत गरे ।

“अब सरकारको पनि ध्यान कता जाओस् कता नजाओस् । सरकारमा हुनेको ध्यान टिक्नेमा हुन्छ । सरकारमा नहुनेको ध्यान ढाल्नेमा हुन्छ । देशतिर कसले ध्यान दिने ? यो खालको अवस्थाबाट चाहिँ हामीहरू अलि माथि उठेर साँच्चैको एउटा डेमोक्रेटिक एक्सरसाइज गर्ने र स्वास्थ्य तरिकाले चल्ने हो भने समाजलाई मद्धत पुर्‍याउन सकिन्छ । त्यसलाई सच्याउने कोसिसमा छौँ । हामी त्यसलाई ठिक बाटोमा लैजाने कोसिसमा छौँ,” ओलीले भने ।

पूर्वप्रधानमन्त्री ओलीले एमाले पार्टी सत्य र इमानमा विश्वास गर्ने पार्टी भएकाले नेता तथा कार्यकर्ता पनि सत्यको बाटोमा हिँड्नुपर्ने बताए । उनले नेता तथा कार्यकर्तालाई छलछाम र चलाखीको बाटो नलिनसमेत आग्रह गरे ।

“हामीले सत्यको बाटो लिने हो । छलछामको बाटो लिने होइन । चलाखीको बाटो होइन । इमानको बाटो लिने हो,” उनले भने, “हामी अनुशासित ढंगले अगाडि बढ्छौँ । एमालेपन भनेको अनुशासित हो ।” एमाले पार्टी सत्यसँग कहिल्यै नलड्ने, शक्तिसँग नझुक्ने भन्दै उनले सत्यसँग बाझिएको शक्ति छ भने हामी त्यस्तो शक्तिसँग नझुक्ने बताए ।