काठमाडौं, २ पुस । सागर सुब्बा निर्देशित लिम्बू संस्कृतिमा आधारीत चलचित्र लोजिमाको हालै भारतको सिक्किम राज्यमा भव्य रुपमा ग्राण्ड प्रिमियर शो सम्पन्न भएको छ ।

सिक्किमको सोमबारे दाराम्देनमा आयोजित उक्त प्रिमियरमा आयोजकले अपेक्षा गरेभन्दा अधिक मात्रामा चलचित्र हेर्न सिक्किमे दर्शकहरु ओर्लिएपछि हाउसफुलका साथ २ शोहरु आयोजना गरिएको थियो । लोजिमा चलचित्रको प्रिमियरमा सहभागी हुन नेपालबाट चलचित्रकी नायिका विमला खजुम र गायक तथा क्यामरामेन निर्मल सुब्बा आशीषसंगै सिक्किम पुगेका निर्देशक सागर सुब्बाले आफूले पृथक कथावस्तुमा चलचित्र लोजिमा निर्माण गरेकाले चलचित्र प्रर्दशन हुनुअघि दर्शकहरुको प्रतिक्रिया कस्तो रहला भन्ने केही त्रास रहे पनि दर्शकहरुको अपार मायासंगै निकै उत्साहित भएको बताए । सो चलचित्रका अफिसियल फोटोग्राफर निर्मल सुब्बा आशीषले पनि सिक्किमे दर्शकहरुले चलचित्र लोजिमालाई निकै रुचाएको प्रतिक्रिया दिए।

आशाहाङ आङ्बो र विमला खजुमको मुख्य भूमिका रहेको चलचित्र लोजिमाको छायांकन पनि सिक्किममै गरिएको थियो । सिक्किममा सम्पन्न प्रिमियर शोपछि अब नेपालको झापा, सिक्किमकै अन्य स्थान र विदेशमा समेत चलचित्र लोजिमा प्रर्दशनको तयारी भईरहेको निर्देशक सुब्बाले बताए ।