काठमाडौं, ५ माघ । ओएसनेपालको आयोजनामा वरिष्ठ कवि, गीतकार एवं साहित्यकार सुरेन्द्र महर्जन ‘अमर’ को ३४ औं कृर्ति मायाको ऐना गीतिएल्बम एक समारोहबीच वरिष्ठ कवि एवं गीतकार प्रा. मन्जुलद्वारा सार्वजनिक भएको छ । साहित्यकार सुरेन्द्र महर्जन “अमर” र साहित्यकार मन्जुलको एकाइ वर्षपछिको भेट तथा एक समारोहबीच साहित्यिक कार्यक्रमको आयोजनामा उक्त एल्बम सार्वजनिक गरिएको थियो । विश्व चर्चित भारतीय गायक कुमार सानुको स्वरमा तिम्रो मायाको सागरमा पौडी रहन पाउँ, जिन्दगीभरी तिम्रै साथमा दौडी रहन पाउँ, र गायक सुमन श्रेष्ठको स्वरमा आँखैमा बस्यौ तिमी मुटुका बस्यौ मलाई मायामा पल्कायौ, पानी झैँ छलछल छल्किने तिम्रो जवानी झल्कायौ ,दुई गीत विश्व कृतिमानी चर्चित संगीतकार सन्तोष श्रेष्ठको संगीतमा रहेको छ ।

एल्बम सार्वजनिक गर्दै वरिष्ठ साहित्यकार एवं गीतकार प्रा. मन्जुलले धेरै पछिको अन्तराल अर्थात दुई दशकपछि साहित्यकार अमरसँग भेट भएको र अहिले उनको रचनामा रहेको एल्बम सार्वजनिक गर्दा एकदम खुशीको महसुस गरेको बताए । दुई दशक अगाडि विभिन्न अनेकौं कार्यक्रमहरूमा हाम्रो भेट भएको स्मरण गर्दै दुई दशकपछिको भेटमा पनि साहित्यकार अमर पहिले झैं साहित्य, गीत, संगीतमा निरन्तर लागेकोमा खुशी व्यक्त गरे । यस्तै गरि साहित्यकार एवं प्रा. सुस्मिता नेपालले पनि साहित्यकार अमरको साहित्य क्षेत्रमा थप उन्नति प्रगतिको कामना गरिन।

ओएसनेपालको प्रस्तुति रहेको एल्बम सार्वजनिक समारोहमा संगीतकार सन्तोष श्रेष्ठ, फिल्म निर्देशक रोशन कुमार श्रेष्ठ, फिल्म निर्देशक प्रेम बस्याल, गायक सुर्यकमल राई लगायतले एल्बमका बारेमा आ–आफ्नो भनाईहरु ब्यक्त गरेका थिए । कार्यक्रमको सभापति ओएसनेपालकोतर्फबाट विवेक कार्कीले गरेका थिए ।