काठमाडौं २१ चैत । अमेरिकी राष्ट्रपति जो बाइडेन र चिनियाँ राष्ट्रपति सी चिनफिङबीच टेलिफोन वार्ता भएको छ। उनीहरुले सहकार्यका क्षेत्रबारे छलफल गरेको जनाइएको छ।

लागुऔषध र जलवायु परिवर्तनबारे उनीहरुको कुरा मिलेको तर ताइवान र आर्थिक मामिलामा कुरा नमिलेको जनाइएको छ।

बाइडेनले ताइवानलाई अमेरिकाले सहयोग गर्नमा जोड दिएको र सीले दक्षिण चीन सागरमा अमेरिकी हस्तक्षेप अस्वीकार्य रहेको बताए।

सीले अमेरिकाले लगाएका आर्थिक प्रतिबन्धको विषय पनि उठाएका थिए। यो चीनको अर्थतन्त्र, व्यापार, विज्ञान र प्रविधि दबाउने प्रयास भएको उनले बताए।

‘यदि अमेरिका चीनको प्रविधि विकासलाई दबाउन खोज्छ र वैध अधिकारबाट चीनलाई वञ्चित गर्न खोज्न भने हामी हेरेर बस्दैनौँ,’ सीले भनेका छन्।

असमझदारीका बाबजुद ह्वाइट हाउस र चिनियाँ सरकारी सञ्चारमाध्यम दुवैले दुई नेताको संवाद खुला र रचनात्मक भएको बताएका छन्।

एक घण्टा ४५ मिनेट लामो संवादमा बाइडेनले रुसलाई चीनको सहयोग जारी रहेको विषयमा पनि प्रश्न उठाएका थिए। एजेन्सी