काठमाडौं १५ जेठ । नेपाली राष्ट्रिय महिला फुटबल टोली तथा एपीएफ क्लबकी स्टार फरवार्ड सावित्रा भण्डारी साम्बाले नेपालले विश्वकपको सपना देख्नुभन्दा पहिला साफ च्याम्पियनसिप र एसियन गेम्सलाई ध्यान दिन जरुरी रहेको बताएकी छिन्।

फ्रान्सको शीर्ष डिभिजन क्लब एन अभान्ट गुएङग्याम्पमा आबद्ध साम्बा मंगलबार स्वदेश फर्किएकी हुन्।

त्रिभुवन विमानस्थलमा नेपालखबरसँग युरोपियन लिगको अनुभव सुनाउँदै साम्बाले अन्य देशका खेलाडी प्रशिक्षणमा व्यस्त हुँदा नेपालका खेलाडी भने फुर्सदिला रहेको बताएकी छिन्।

उनले भनिन्, ‘अहिलेको अवस्थामा महिला फुटबलको अवस्था देखेर प्रायोजक पनि पछि सर्न थालेकाले एन्फाले सोच्नुपर्ने बेला आएको छ।’

फ्रान्सेली लिगको अनुभव सुनाउँदै साम्बाले सुरुवातमा आफुलाई केही असहज भएपनि विस्तारै बानी परेको बताइन्।

सन् २०२३–२४ को सिजन सकिएसँगै साम्बा माल्टा र डेनमार्कमा सम्मान कार्यक्रम थापेर स्वदेश फर्किएकी हुन्। आगामी सिजन पनि गुएङग्याम्पमा नै रहने साम्बा केही समय नेपालमा रहनेछिन्।

इजरायलको हापोयल रानानाबाट युरोपियन लिगमा डेब्यु गरेकी साम्बाले हमास आक्रमणपछि इजरायल छाडेकी थिइन्।

त्यसपछी फ्रान्सको शीर्ष डिभिजन क्लबमा आबद्ध भएकी थिइन्। सिजनको बीचमा गुएङग्याम्पमा जोडिएकी साम्बाले सुरुवातमा भाषाको समस्या भएपनि पनि अझै सिक्नका लागि फ्रान्सेली क्लबमा नै रहने निर्णय गरेको बताइन्।

फ्रान्सेली लिगबाट वाफ च्याम्पियनसिप खेल्न साउदी अरब पुगेकी साम्बा उतैबाट फ्रान्स फर्केकी थिइन््। फिफा विन्डोको कारण साम्बाले वाफको फाइनल गुमाएकी थिइन्। वाफमा सर्वाधिक गोलकर्ता बनेकी साम्बाले व्यवसायिक सम्झौताका कारण आफुले वाफको फाइनल खेल्न नपाएको समेत प्राष्ट पारिन्। समर्थकलाई साम्बाले आफ्नो बाध्यता बुझ्न आग्रह गर्दै सधै साथको लागि समेत आग्रह गरिन्।

वाफ पछि साम्बा लगायत अन्य नेपाली खेलाडीलाई साउदीका क्लबले चासो देखाएका छन्।

यसलाई साम्बाले सकारात्मक रुपमा लिएकी छिन्। उनले भनिन्, साउदीले महिला फुटबललाई प्राथमिकता दिदै अघि बढेकाले नेपाली खेलाडीलाई आउने अवसर आफ्नो क्षमताको कारण रहेकाले यसलाई सकारात्मक रुपमा लिएको बताइन्।

नेपालले आगामी असोजमा बंगलादेशमा साफ च्याम्पियनसिप खेल्दैछ। अन्य देशले साफको तयारी सुरु गर्दा नेपाली टोलीको भने प्रशिक्षणको टुङगो छैन।

महिला फुटबल नहुँदा विभागीय क्लबले खेलाडीलाई हेर्ने दृष्टिकोण परिवर्तन हुँदै गएकाले एन्फाले लिग गराउन जरुरी भैसकेको साम्बाले बताइन्।

राष्ट्रिय टोलीका केही खेलाडीले भारतिय लिग खेलेपनि अन्य खेलाडीलाई गाह्रो हुने भएकाले एन्फाले ध्यान दिन जरुरी भैसकेको बताइन्।