काठमाडौं ३१ जेठ । न्यु जिल्यान्डलाई पराजित गर्दै आयोजक वेस्ट इन्डिज आईसीसी टी(२० विश्वकपको सुपर ८ मा पुगेको छ।

बिहीबार भएको खेलमा न्यु जिल्यान्डलाइ १३ रनले पराजित गर्दै घरेलु टोली वेस्ट इन्डिज १ खेलअगावै सुपर ८ मा पुगेको हो।

विश्वकपमा वेस्ट इन्डिजले लगातार तेस्रो जित निकाल्दा न्यु जिल्यान्डले भने दोस्रो हार व्यहोरेको छ।

वेस्ट इन्डिजले दिएको १ सय ५० रनको लक्ष्य पछ्याएको न्यु जिल्यान्डले निर्धारित २० ओभरमा ९ विकेटको क्षतिमा १ सय ३६ रन मात्र बनाउन सक्यो।

न्यु जिल्यान्डका ग्लेन फिलिप्सले सर्वाधिक ४० रनको योगदान दिए। फिन एलेनले २६ रन थपे। मिचेल सान्टनरले २१ रन बनाए।

न्यु जिल्यान्डलाई कम स्कोरमा रोक्न अल्जारी जोसेपले ४ विकेट लिए। गुणाकेस मोतीले ३ विकेट झारे।

अकेल हुसेन रआन्दे रसेलले समान १ विकेट आफ्नो नाममा गरे।

त्यसअघि ट्रिनिडाडस्थित ब्रायन लारा स्टेडियममा न्युजिल्यान्डले टस जितेर फिल्डिङ रोजेपछि ब्याटिङ गरेको वेस्टइन्डिजले निर्धारित २० ओभरमा ९ विकेटको क्षतिमा १ सय ४९ रनको योगफल तयार पारेको थियो।

वेस्ट इन्डिजका लागि शेफेन रथरफोर्डले अर्धशतक पूरा गरे। उनले ३९ बलमा २ चौका र ६ छक्का सहयोगमा सर्वाधिक ६८ रनको योगदान दिए।

निकोलस पुरनले १७ रन थपे। अकेल हुसैनले १५, आन्द्रे रसेलले १४ र रोमारियो सेफार्डले १३ रन बनाए।

न्युजिल्यान्डका ट्रेन बोल्टले ३ विकेट लिए। उनले आफ्नो स्पेलमा १ मेडन राख्दै १६ रन खर्चे। टिम साउथी र लोकी फर्गुसनले समान २ विकेट लिए। जेम्स निसाम र मिचेल सान्टनरले समान १ विकेट आफ्नो नाममा गरे।

लगातार तेस्रो जित निकालेको वेस्ट इन्डिज ६ अंकमा शीर्ष स्थानमा छ। २ खेलबाट ४ अंक भएको अफगानिस्तान दोस्रो स्थानमा छ।
३ खेलमा २ अंक भएको युगान्डा तेस्रो स्थानमा छ।

समान २ खेलमा हार भोगेका पपुवा न्यु गिनी र न्यु जिल्यान्ड अंक तालिकाको पुछारमा छ।