काठमाडौं, २३ फागुन । काठमाडौं उपत्यकाको फोहोर व्यवस्थापनका लागि निजी कम्पनीसँग परियोजना विकासको प्रारम्भिक सम्झौता गरिएको छ ।

लगानी बोर्डले बुधबार काठमाडौं उपत्यकाको फोहोर व्यवस्थापनका लागि निजी कम्पनी नेपवेष्टसँग परियोजना विकासको प्रारम्भिक सम्झौता गरेको हो ।

दुई महिनाभित्र सम्झौतालाई अन्तिम रुप दिई कामै सुरु गर्ने गरी नेपवेष्ट कम्पनीसँग उपत्यकाको फोहोर व्यवस्थापनका लागि प्रारम्भिक सम्झौता गरिएको लगानी बोर्डका प्रमुख कार्यकारी अधिकृत महाप्रसाद अधिकारीले जानकारी दिनुभयो ।

परियोजना लगानी सम्झौतालाई मन्त्रिपरिषद बैठकले अनुमोदन गरेपछि कम्पनीले काठमाडौंको फोहोर उठाउन सुरु गर्नेछ । सम्झौता भएको ६ महिनाभित्र फोहोर उठाउन आवश्यक तयारी गर्ने म्याद दिइएको पनि प्रमुख कार्यकारी अधिकृत अधिकारीले स्पष्ट पार्नुभयो ।

काठमाडौं उपत्यकाभित्रका सबै स्थानीय तहलाई सहभागी गराउनुपर्ने भएकाले फोहोर व्यवस्थापनको काम सुरु गर्न केही ढिलाई हुने लगानी बोर्डको भनाई छ ।

नेपवेष्ट नेपालको अर्गानिक भिलेज र फिनल्याण्डको कम्युनिकेशन प्रालिको जोइन्ट भेन्चर कम्पनी हो । बुधबार कम्पनीले उपत्यकाको फोहोर उठाउने कामको प्रारम्भिक सम्झौता गरेको हो ।

दुई महिनाभित्र सम्झौतालाई अन्तिम रुप दिनेवित्तिकै काठमाडौं उपत्यकाको फोहोर कम्पनीले उठाउन थाल्नेछ । पहिलो चरणमा यो परियोजना कार्यान्वयन गर्न चार अर्ब ४० करोड रुपैयाँ लाग्ने बोर्डको अनुमान छ ।

यो परियोजना २०१० सालमै स्थापना गरिएको थियो । कम्पनीले २० वर्षसम्म सरकारलाई एक अर्ब ८० करोड रुपैयाँ रोयल्टी बुझाउनुपर्नेछ । कम्पनीले संकलित फोहोर प्रशोधन गरी बिजुली, ग्याँस, कम्पोष्ट मल उत्पादन गर्ने योजना बनाएको छ ।