काठमाडौं १८ पुस । भारतमा लखनउको एक होटलमा एकै परिवारका पाँच जनाको शव भेटिएको छ । लखनउको नाका क्षेत्रमा नयाँ वर्षको पहिलो दिन नै एउटै परिवारका पाँच जनाको शव भेटिएको प्रहरीले जनाएको छ ।

प्रहरीका अनुसार मृतकमध्ये आमा र उनका चार जना छोरी रहेका छन् । उनीहरू सबै नयाँ वर्ष मनाउन आगराबाट लखनउ आएका थिए । प्रहरीले मृतक आमाका छोरा अरशदलाई पक्राउ गरेको छ । अरशदले आफूले नै हत्या गरेको स्वीकारेका डीएसपी रवीना त्यागीलाई उद्धृत गर्दै बीबीसी हिन्दीले जनाएको छ ।

हत्यामा उनका बुबा पनि संलग्न रहेको शङ्कामा प्रहरीले खोजी गरिरहेको छ । प्रारम्भिक अनुसन्धानले पारिवारिक झगडाका कारण आमा र चार जना छोरीको हत्या भएको देखाएको छ ।

प्रहरीका अनुसार हत्या हुनुअघि पाँचैं जनालाई अभियुक्तले नशालु पदार्थ खुवाएका थिए । गला दबाएर र नशा काटेर उनीहरूको हत्या भएको पाइएको छ ।

मृतक दिदिबहिनी सबै २० वर्षमुनिका छन् । उनीहरू नौ वर्षकी आलिया, १९ वर्षीया अलसिया, १६ वर्षीया अक्सा र १८ वर्षीया रहमानी रहेका प्रहरीले जनाएको छ ।