काठमाडौं १४ माघ । लिसान्ड्रो मार्टिनेजको निर्णायक गोलमा म्यानचेस्टर युनाइटेडले इङ्लिस प्रिमियर लिगमा फुलहामलाई पराजित गरेको छ।

आइतबार राति क्राभेन कटेजमा भएको खेलमा युनाइटेडले फुलहाममाथि १–० को साघुँरो जित निकालेको हो। जितसँगै युनाइटेडले लिगमा महत्त्वपूर्ण ३ अंक बटुलेको छ।

पहिलो हाफ गोलरहित बराबरीमा सकिएको खेलमा दोस्रो हाफमा मात्र गोल सम्भव भयो। खेलको ७५ औँ मिनेटसम्म दुवै टोलीले गोलका लागि निकै सर्घष गरेका थिए। तर खेलको ७८ औँ मिनेटमा मार्टिनेजको प्रहार डिफ्लेक्ट हुँदै गोलमा परिणत भएको थियो।

जितसागै युनाइटेड २९ अंकमा तालिकाको १२ औँ स्थानमा उक्लेको छ। पराजित फुलहाम ३३ अंकमा तालिकाको १० औँ स्थानमा छ।

गएराति नै भएको अन्य खेलमा लेस्टर सिटीले टोटनहम हट्सपुरलाई तथा ब्रेनफोर्डले क्रिस्टल प्यालेसनलाई समान २–१ गोल अन्तरले पराजित गरे। वेस्ट ह्याम युनाइटेड र एस्टोन भिल्लाले भने १–१ को बराबरी गर्दै अंक बाँडे।