काठमाडौ १६ जेठ । भारतको विदेश मन्त्रालयले यस वर्ष जनवरीदेखि अहिलेसम्म अमेरिकाबाट एक हजार भारतीय नागरिकलाई स्वदेश फिर्ता पठाइएको बताएको छ।

बीबीसी हिन्दीका अनुसार भारतीय विदेश मन्त्रालयका प्रवक्ता रणधीर जयसवालले विस्तृत विवरण नदिए पनि यी मध्ये लगभग ६२ प्रतिशत मानिसहरू व्यावसायिक उडानबाट भारत फर्किएको बताए।

डोनाल्ड ट्रम्प दोस्रोपटक अमेरिकाको राष्ट्रपति बनेपछि अवैध रूपमा बसोबास गरिररहेका आप्रवासीहरूलाई धमाधम स्वदेश फिर्ता पठाइरहेका छन्।

यस वर्ष फेब्रुअरीमा अमेरिकाले अमेरिकी सैन्य विमानमार्फत सयभन्दा बढी भारतीय नागरिकलाई आफ्नै देशमा पठाइदिएको थियो।

झन्डै १८ हजार भारतीय नागरिक अमेरिकामा अवैध रूपमा बसोबास गरिरहेको विश्वास गरिएको छ।

यस महिनाको सुरुमा भारतस्थित अमेरिकी दूतावासले तोकिएको अवधिभन्दा बढी समय अमेरिकामा बसे देश निकाला हुन सक्ने र त्यस्ता व्यक्तिलाई स्थायी रूपमा अमेरिका प्रवेशमा प्रतिबन्ध लाग्ने चेतावनी दिएको थियो।