बाँके १८, चैत्र । बाँकेको कोहलपुर नगरपालिका यस आर्थिक बर्षमा लक्ष्य अनुसारको राजश्व संकलन गर्न असफल हुने देखिएको छ । नयाँ संविधान अनुसार कोहलपुर नगरपालिकाका स्थानीय सरकार समेत हो ।

आर्थिक बर्ष २०७४÷७५ को ८ महिनामा नगरपालिकाले उठाएको राजश्व हेर्ने हो भने लक्ष्य अनुसार असार मसान्तसम्म राजश्व संकलन गर्न असफल हुने देखिन्छ । लक्ष्य अनुसार नगरपालिकाले राजश्व संकलन गर्न नसके स्थानीय सरकारको रुपमा हेरिएको स्थानीय तहलाई पहिलो गासमा नै ढुङ्गा लाग्ने देखिन्छ ।

कोहलपुर नगरपालिकाले आर्थिक बर्ष २०७४÷०७५ मा अनुमानित ४ करोड ४८ लाख ७० हजार राजश्व संकलन गर्ने लक्ष्य राखेको थियो । यस आर्थिक बर्षको ८ महिनामा नगरपालिकाले १ करोड ७० लाख ३४ हजार ६ सय ४६ रुपैया मात्र राजश्व संकलन गर्न सकेको छ । अनुमानित बजेट अनुसार नगरपालिकाले फागुन मसान्तसम्म ३ करोड ३६ लाख ५२ हजार ५ सय रुपैया राजश्व संकलन गरिसक्नुपर्ने थियो ।

फागनु मसान्तसम्म १ करोड ६६ लाख १७ हजार ८ सय ५४ रुपैया लक्ष्य अनुसार राजश्व कम संकलन भएको छ । कोहलपुर नगरपालिकाका प्रमुख लुटबहादुर रावतले लक्ष्य अनुसार राजश्व उठ्न नसकेको बताए । यस आर्थिक बर्षमा लक्ष्य अनुसार राजश्व संकलन गर्न नसकिए पनी आर्थिक बर्ष २०७५÷०७६ मा लक्ष्य अनुसार राजश्व सकंलन हुने उनको भनाई रहेको थियो ।

नगरपालिकाको तथ्याक अनुसार विभिन्न शिर्षकमा उठ्नुपर्ने राजश्व संकलन समेत कम हुदै आएको पाउन सकिन्छ । लक्ष्य अनुसार राजश्व संकलन नहुदा नगरपालिकाले आन्तरिक श्रोतबाट विभिन्न शिर्षकमा छुट्याएको ठाउँमा रकम खर्च गर्न समस्या पर्ने देखिन्छ ।

स्थानीय तहमा जनप्रतिनिधी आएपछि राजश्वमा वृद्वि हुने लक्ष्य राखिएको थियो । लक्ष्य अनुसारको कर संकलन गर्न नसक्नुको मुख्य कारण नगरपालिकाको आफ्नो कार्य योजना नरहनु र स्थानिय व्यवासायीहरुलाई करको दायरामा ल्याउन नसक्नु रहेको बताइन्छ ।

कोहलपुर नगरपालिकाका प्रमुख प्रशासकिय अधिकृत प्रेम देवकोटाले नगरपालिकाले लक्ष्य अनुसारको राजश्व संकलन गर्न नसक्नुको मुख्य कारण एकिकृत सम्पति कर लागु गर्न नसक्नु रहेको बताए । आफुहरु बाँकि समयमा नगरपालिका भित्रमा सबै व्यवसायिकलाई करको दायरमा ल्याएर लक्ष्य अनुसारको राजश्व संकलन गर्न लागिपर्ने उनको भनाई रहेको छ ।

आर्थिक बर्ष २०७३÷०७४ मा समेत कोहलपुर नगरपालिकाले आफ्नो लक्ष्य अनुसार राजश्व संकलन गर्न सकेको थियो । गत आर्थिक बर्षमा नगरपालिकाले ३ करोड ५० लाख रुपैयाको लक्ष्य लिएकोमा २ करोड ६३ लाख ३५ हजार ९ सय ५१ रुपैया मात्र संकलन गर्न सफल भएको थियो । जुन कुल राजश्वको ७५ प्रतिशत हो ।

सधैभरी कोहलपुर नगरपालिकाले लक्ष्य भन्दा कम राजश्व संकलन गर्नुभन्दा पनी लक्ष्य भन्दा बढी राजश्व उठाउन नगरपालिकाले आफ्ना सबै संयन्त्रहरु परिचालन गर्न जरुरी छ ।