नयाँदिल्ली, २३ चैत। भारत भ्रमणमा रहेका प्रधानमन्त्री केपी शर्मा ओलीले भारतसँगको भ्रम र असमझदारी हटेको बताएका छन् ।

शुक्रबार नयाँदिल्लीस्थित नेपाली दूतावासमा प्रवासी नेपालीहरुले गरेको कार्यक्रममा भारतमा बस्ने नेपालीले छिमेकीसँगको सम्बन्ध तनावपूर्ण हुन्छ कि भनेर चिन्ता नगर्न समेत आग्रह गरेका हुन् ।

छिमेकीहरुसँग समानता, बराबरी र पारस्परिक सहयोगात्मक सम्बन्ध विकास गर्ने बताउँदै प्रधानमन्त्री ओलीले भारत र चीन दुबै छिमेकीको साथ लिएर अघि बढ्ने बताए ।

‘हामी भारत र चीन दुईवटै छिमेकीको साथ लिएर अघि बढ्छौं’ उनले भने ‘ छिमेकीहरुसँग सहकार्य गरेर साथ लिएर विकास अगाडि बढाउनुपर्छ ।’

नेपालमा अहिले आफ्नो नेतृत्वमा इतिहासकै सु्दृढ सरकार बनेको बताउदै प्रधानमन्त्री ओलीले आर्थिक उन्नती र लोकतन्त्रको सुदृढिकरणका लागि जनताले आफूलाई गरेको विश्वासलाई तलमाथि हुन नदिने बताएका छन् ।