काठमाडौं,२४ चैत। प्रधानमन्त्री केपी शर्मा ओलीको भारत भ्रमणको समयमा गृहमन्त्रीको क्वार्टरमा प्रधानमन्त्रीविरुद्ध माओवादी मन्त्रीहरुको गोप्य बैठक बसेको छ ।

माओवादीका तर्फबाट सरकारमा सहभागी मन्त्रीमध्ये मात्रिका यादव र गिरिजामणि पोखरेल बाहेकको उपस्थिति रहेको सो बैठकमा गृहमन्त्री रामबहादुर थापा बादलले प्रधानमन्त्री केपी ओलीविरुद्ध आक्रोश गरिएको थियो ।

गृहमन्त्री बादलले प्रधानमन्त्रीले आफूलाई कुनै जानकारी नै नदिई गृहसचिव सुरुवा गरेर प्रेम राईलाई नयाँ गृहसचिव बनाएको भन्दै गृहमन्त्री थापाले ओलीविरुद्ध आक्रोश पोखेका थिए ।

‘प्रधानमन्त्री केपी ओलीले सचिवहरुलाई मन्त्रीप्रति उत्तरदायी नभई प्रधानमन्त्रीप्रति नै उत्तरदायी बनाउन खोजेको देखियो,’ गृहमन्त्री वादलको भनाइ उधृत गर्दै एक स्रोतले जानकारी दियो । ‘गृहमन्त्रालयमा आएका नया सचिव प्रेम राई एमाले निकट रहेको आफ्नो भनाई नमान्ने बादलको दावी छ ।

प्रधानमन्त्री ओलीले भारत जाने बेलामा क्याबिनेटको बैठकै नराखी गलत प्रक्रियाबाट सचिवहरुको सरुवा गरेको माओवादी मन्त्रीहरुको आरोप छ । यसरी एकलौटी ढंगबाट सरकार चल्न नसक्ने भन्दै भेलामा गृहमन्त्री थापाले ओलीविरुद्ध आक्रोश पोखेको स्रोतले बतायो ।

गृहमन्त्री बादलले बोलाएको बैठकमा मात्रिका यादव र गिरिजामणि पोखरेल भने सहभागी थिएनन् । पोखरेल शिक्षा मन्त्रालयको कार्यक्रममा धुलिखेलमा थिए भने यादव केपी ओलीसँगै दिल्ली गएका छन् ।

सरकारमा रहेका माओवादी नेताहरुले पार्टी अध्यक्ष प्रचण्डलाई यसबारे कुरा राख्ने अनि प्रचण्डले केपी ओलीलाई सम्झाउने एक माओवादी नेताले बताए ।’

प्रचण्डनिवासमा पुगे गृहमन्त्री

यसैबीच शनिबार बिहान प्रचण्डनिवास खुमलटारमा गृहमन्त्री रामबहादुर थापा बादल र माओवादी अध्यक्ष प्रचण्डवीच छलफल भएको छ ।

प्रधानमन्त्री ओलीले मन्त्रीहरुलाई कुनै जानकारी नै नदिई सचिवहरुको सरुवा गरेको विषयमा प्रचण्डले प्रधानमन्त्री भारतबाट फर्केपछि कुरा गर्ने स्रोतले बतायो ।