काठमाडौं, २४ जेठ । नेपालले एशियाली खेलकुद क्रिकेट छनोट प्रतियोगिताको फाइनलमा स्थान बनाएको छ । आज सिंगापुरको नेशनल क्रिकेट मैदानमा भएको पहिलो सेमिफाइनल खेलमा नेपालले ओमानलाई ८ विकेटले पराजित गर्दै फाइनल यात्रा तय गरेको हो ।

टस जितेर पहिले ब्याटिङ गरेको ओमानले १९ ओभर ४ बलमा मात्र ९४ रनमा अलआउट भयो । ओमानका कप्तान सफ्यान मेहमुदले ३८ रनको सर्वाधिक स्कोर बनाए भने जुबैर अल बलुशीले २२ र अब्दुल जाइलले १६ रन जोडे । नेपालका लागि करण केसीले ३ विकेट लिए भने सोमपाल कामी र सन्दीप लामिछानेले २–२ विकेट तथा शाहब आलम, कुशल मल्ल र दीपेन्द्रसिंह ऐरीले १–१ विकेट हात पारे ।

जवाफमा नेपालले ९५ रनको लक्ष्य ९ ओभर २ बलमा मात्र २ विकेट गुमाएर पूरा गर्‍यो । लोकेश बमले अविजित ४४ रन बनाए भने कप्तान रोहित पौडेलले २१ रनको योगदान दिए । कुशल भुर्तेल २० रन बनाएर आउट भए । ओमानका समीर ओटमनले २ विकेट लिए ।

यो जितसँगै नेपाल उपाधि नजिक पुगेको छ । फाइनलमा नेपालले हङकङ र मलेसियाबीच हुने दोस्रो सेमिफाइनलको विजेतासँग प्रतिस्पर्धा गर्नेछ ।