काठमाडौं, ७ असार । वैकल्पिक खेलाडीका रूपमा मैदान छिरेका डेनिज उन्दाभले इन्जुरी समयमा निर्णायक गोल गरेपछि जर्मनीले आइभोरी कोस्टमाथि २–१ को रोमाञ्चक पुनरागमन जित निकालेको छ । यो जितसँगै जर्मनी विश्वकपको नकआउट चरणमा प्रवेश गर्न सफल भएको छ ।

शनिबार राति सम्पन्न समूह ‘ई’ को तनावपूर्ण खेलमा जर्मनीका दुईवटा गोललाई रेफ्रीले मान्यता दिएका थिएनन् । पहिलो हाफमा पछि परे पनि जर्मनीले आफ्नो लय गुमाएन र उत्कृष्ट पासिङ गेमको मद्दतले खेलमा फर्कियो । अर्कोतर्फ, पश्चिम अफ्रिकी टोली आइभोरी कोस्टले पनि आक्रामक र गतिशील फुटबल पस्किएको थियो ।

खेलको ६८ औं मिनेटमा उन्दाभले उत्कृष्ट भली प्रहारमार्फत गोल गर्दै जर्मनीलाई १–१ को बराबरीमा ल्याएका थिए । त्यसपछि इन्जुरी समयमा उनले डिफेन्डरलाई छक्काउँदै प्रहार गरेको बल आइभोरी कोस्टका गोलकिपर याहिया फोफानाले रोक्ने कुनै मौका नै पाएनन् । यी भर्सटाइल स्ट्राइकर उन्दाभको पछिल्ला आठ खेलमा यो नवौं गोल हो ।

खेलको अन्तिम क्षणमा आइभोरी कोस्टका साइमन अडिंग्राले गोल गर्ने अवसर पाएका थिए, तर उनले बक्सभित्र प्रहार गर्न सकेनन् । लगत्तै प्रतिआक्रमणमा जर्मनीका नथानियल ब्राउनले प्रहार गरेको प्रहारलाई फोफानाले उत्कृष्ट बचाउ गरे ।

खेलको पहिलो हाफमा यान डियोमान्डेको क्रसमा अमाद डियालोको प्रहार रिवाउन्ड भएर आएपछि फ्रान्कले गोल गर्दै आइभोरी कोस्टलाई सुरुवाती अग्रता दिलाएका थिए । विश्वकपमा आइभोरी कोस्टले लगातार सातौं खेलमा गोल गरेको यो पहिलो कीर्तिमान हो ।

टोरन्टोमा जर्मन मूलका झन्डै १ लाखभन्दा बढी मानिसको उपस्थिति रहेकाले जुलियन नागेल्सम्यानको टोलीले घरेलु मैदानजस्तै समर्थन पाएको थियो । तर, पहिलो हाफमा गोलका लागि ८ पटक प्रयास गरे पनि सफल हुन नसक्दा जर्मन टोली निराश देखिएको थियो ।

खेलको २५ औं मिनेटमा जर्मनीका मिडफिल्डर अलेक्जेन्डर पाभ्लोभिचले कर्नरमार्फत आएको बललाई हेड गर्दै गोल गरे पनि रेफ्रीले गोलकिपर फोफानामाथि फल भएको भन्दै त्यसलाई मान्यता दिएनन् । रेफ्रीको यो निर्णयप्रति जर्मन समर्थकले चर्को असन्तुष्टि पोखेका थिए । त्यसको केही समयमै आइभोरी कोस्टले अग्रता लियो ।

खेलको दोस्रो हाफमा पनि जर्मनीका जमाल मुसियालाले बल नेटको दिशा दिएका थिए, तर बिल्ड(अपका क्रममा ओडिलोन कोसोउनाउमाथि फल भएको भन्दै रेफ्रीले पुनः गोल रद्द गरिदिएका थिए ।

यस जितसँगै दुई खेलबाट ६ अंक जोड्दै जर्मनी समूह ‘ई’ को शीर्ष स्थानमा रहँदै अन्तिम ३२ मा पुगेको छ । पराजित आइभोरी कोस्टको ३ अंक छ ।

अब जर्मनीले समूह चरणको अन्तिम खेल बिहीबार न्यू जर्सीमा इक्वेडरसँग खेल्नेछ भने आइभोरी कोस्टले फिलाडेल्फियामा कुरासाओको सामना गर्नेछ ।