काठमाडौं ११ असार । फिफा विश्वकप २०२६ अन्तर्गत समूह ‘डी’को अन्तिम खेलमा टर्कीसँग ३–२ गोलअन्तरले पराजित भए पनि सहआयोजक अमेरिका समूह विजेताका रूपमा नकआउट चरणमा प्रवेश गरेको छ।

अमेरिकाले यसअघि लगातार दुई खेलमा जित निकाल्दै ६ अंक जोडिसकेको थियो। अन्तिम खेलमा हार बेहोरे पनि समान ६ अंक भएका टोलीहरूमध्ये गोलअन्तरका आधारमा शीर्ष स्थान कायम राख्दै अमेरिका समूह विजेता बनेको हो।

जारी खेलमा अमेरिकाले तेस्रो मिनेटमै अस्टिन ट्रस्टीको गोलमार्फत अग्रता लिएको थियो। तर, टर्कीले १०औँ मिनेटमा अर्दा गुलरको गोलबाट खेललाई १–१ को बराबरीमा ल्यायो। त्यसपछि ३१औँ मिनेटमा ओर्कुन कोकुले गोल गर्दै टर्कीलाई २–१ को अग्रता दिलाए।

दोस्रो हाफको ४९औँ मिनेटमा सेबस्टियन बरहाल्टरले अमेरिकाका लागि बराबरी गोल गर्दै खेललाई २–२ को अवस्थामा पुर्‍याए। खेल बराबरीतर्फ उन्मुख भइरहेका बेला इन्जुरी समयको आठौँ मिनेट (९०+८) मा कान आयहानले निर्णायक गोल गर्दै टर्कीलाई ३–२ को रोमाञ्चक जित दिलाए।

जित निकाले पनि टर्कीका लागि यो नतिजा नकआउट चरण पुग्न पर्याप्त भएन। यसअघि पाराग्वे र अस्ट्रेलियासँग पराजित भएको टर्की समूह चरणबाटै बाहिरिएको हो। उता, अन्तिम खेलमा हार बेहोरे पनि अमेरिका समूह विजेताका रूपमा अन्तिम १६ मा स्थान बनाउन सफल भएको छ।