काठमाडौं, असार १५ — फिफा विश्वकप २०२६ अन्तर्गत अन्तिम ३२ को रोमाञ्चक प्रतिस्पर्धामा चार पटकको विश्व च्याम्पियन जर्मनीले मंगलबार पाराग्वेको सामना गर्दैछ। अमेरिकाको बोस्टनस्थित रंगशालामा हुने खेल नेपाली समयअनुसार बिहान २ः१५ बजे सुरु हुनेछ।

समूह ‘ई’ को विजेताका रूपमा नकआउट चरणमा पुगेको जर्मनी उपाधि दाबेदार टोलीमध्ये एक हो। यता, समूह ‘डी’ मा तेस्रो स्थानमा रहे पनि उत्कृष्ट तेस्रो टोलीका रूपमा पाराग्वेले अन्तिम ३२ मा स्थान सुरक्षित गरेको हो।

समूह चरणमा जर्मनीले कुरासाओलाई ७–१ गोलअन्तरले पराजित गर्दै सशक्त सुरुआत गरेको थियो। त्यसपछि आइभरी कोस्टमाथि २–१ को जित निकालेको जर्मनी अन्तिम खेलमा इक्वेडरसँग २–१ ले पराजित भएको थियो।

पाराग्वेले भने पहिलो खेलमा आयोजक अमेरिकासँग ४–१ को हार बेहोरे पनि दोस्रो खेलमा टर्कीलाई १–० ले पराजित गरेको थियो। अन्तिम खेलमा अस्ट्रेलियासँग गोलरहित बराबरी खेलेपछि उपविजेता बन्ने अवसर गुमाए पनि उत्कृष्ट तेस्रो टोलीका रूपमा नकआउट चरणमा प्रवेश गरेको हो।

दुवै टोलीबीच हालसम्म तीन अन्तर्राष्ट्रिय भेट भएका छन्। जर्मनी र पाराग्वेले समान एक–एक खेल जितेका छन् भने एक खेल बराबरीमा सकिएको थियो। सन् २००२ को विश्वकपको प्रि–क्वार्टरफाइनलमा जर्मनीले पाराग्वेलाई १–० ले हराएको थियो।

रणनीतिक रूपमा जर्मनीले ४–२–३–१ को संरचनामा मैदान उत्रिने अपेक्षा गरिएको छ। काई हाभर्ट्ज र जमाल मुसियालाजस्ता आक्रामक खेलाडी जर्मनीका मुख्य हतियार रहनेछन्। यता पाराग्वेका जुलियो इन्सिसो र कप्तान गुस्ताभो गोमेज जर्मनीका लागि चुनौती बन्न सक्छन्। पाराग्वेले ४–१–४–१ वा ५–४–१ को रक्षात्मक रणनीति अपनाउने अनुमान गरिएको छ।

विश्वकप इतिहासमा जर्मनी सबैभन्दा सफल टोलीमध्ये एक हो। उसले १९५४, १९७४, १९९० र २०१४ मा उपाधि जितिसकेको छ। यता पाराग्वेको विश्वकपमा उत्कृष्ट उपलब्धि सन् २०१० मा क्वार्टरफाइनलसम्म पुग्नु हो।

यस खेलको विजेताले प्रि–क्वार्टरफाइनलमा फ्रान्स र स्विडेनबीचको विजेतासँग प्रतिस्पर्धा गर्नेछ।

यस्तै, मंगलबार बिहान अर्को अन्तिम ३२ को खेलमा नेदरल्यान्ड्स र मोरक्को आमनेसामने हुनेछन्। उक्त खेलको विजेताले अन्तिम १६ मा सहआयोजक क्यानडाको सामना गर्नेछ। सोमबार राति ब्राजिल र जापान तथा आइभरी कोस्ट र नर्वेबीच पनि नकआउट चरणका महत्वपूर्ण खेल हुँदैछन्।