काठमाडौं २४ असार । होर्मुज स्ट्रेट हुँदै गइरहेका तीनवटा व्यावसायिक जहाजमाथि भएको आक्रमणपछि अमेरिका र इरानबीचको तनाव पुनः चुलिएको छ। अमेरिकी सेन्ट्रल कमाण्ड (सेन्टकम) का अनुसार अन्तर्राष्ट्रिय जलमार्गमा सञ्चालन भइरहेका जहाजमाथि भएको आक्रमणको जवाफस्वरूप अमेरिकाले इरानका ८० भन्दा बढी सैन्य लक्ष्यमा शृङ्खलाबद्ध हवाई हमला गरेको हो। अमेरिकी पक्षले हवाई रक्षा प्रणाली, कमान्ड तथा नियन्त्रण केन्द्र, तटीय राडार, एन्टी–सिप क्षेप्यास्त्र प्रणाली र आईआरजीसीका दर्जनौँ साना डुङ्गालाई निशाना बनाइएको जनाएको छ। इरानी सरकारी सञ्चारमाध्यमले दक्षिणी इरानका केश्म टापु, बन्दर अब्बास, खार्ग टापु र सिरिक बन्दरगाह क्षेत्रमा विस्फोट भएको तथा केही नागरिक घाइते भएको दाबी गरेका छन्, यद्यपि मानवीय क्षतिको आधिकारिक पुष्टि भएको छैन। अमेरिकाले इरानले मार्सल आइल्यान्ड, साउदी अरब र लाइबेरियाको झन्डा बोकेका तीनवटा व्यावसायिक तेलवाहक जहाजमाथि आक्रमण गरेको आरोप लगाएको छ भने इरानले त्यसबारे कुनै औपचारिक प्रतिक्रिया दिएको छैन। अमेरिकी कारबाहीलाई इरानले ‘खुला अतिक्रमण’ भन्दै कडा निन्दा गरेको छ र ‘विनाशकारी जवाफ’ दिने चेतावनी दिएको छ। इरानी विदेशमन्त्री अब्बास अराघचीले धम्की र सैन्य दबाबको वातावरणमा अमेरिकासँग कुनै वार्ता नहुने अडान दोहोर्याएका छन् भने उपविदेशमन्त्री काजेम गरिबाबादीले अमेरिकी कदमलाई दुई देशबीचको सम्झौताको उल्लङ्घन भएको बताएका छन्। तनावका बीच अमेरिकाले इरानी तेल निर्यातमा दिइएको अस्थायी छुट पनि फिर्ता लिएको छ, जसको प्रभावस्वरूप अन्तर्राष्ट्रिय बजारमा कच्चा तेलको मूल्य २.७ प्रतिशतले बढेर प्रतिव्यारेल ७२.४० अमेरिकी डलर पुगेको रोयटर्सले जनाएको छ। आक्रमणपछि बहराइनमा हवाई आक्रमणको साइरन बजाइएको छ भने कतारले होर्मुज क्षेत्रमा भएको जहाजमाथिको आक्रमणको निन्दा गर्दै इरानलाई जिम्मेवार ठहराएको छ। सुरक्षा विश्लेषकहरूले पछिल्लो घटनाक्रमले मध्यपूर्वलाई पुनः व्यापक द्वन्द्वतर्फ धकेल्ने जोखिम बढाएको चेतावनी दिएका छन्।