काठमाडौँ — मध्यपूर्वमा तनाव उत्कर्षमा पुगेपछि इरानको इस्लामिक रिभोलुसनरी गार्ड कर्प्स को नौसेनाले रणनीतिक रूपमा महत्त्वपूर्ण हर्मोज जलडमरू (Strait of Hormuz) पूर्ण रूपमा बन्द गरेको घोषणा गरेको छ। इरानी अधिकारीहरूको पूर्व-स्वीकृतिबिना कुनै पनि जलसैनिक वा व्यापारिक जहाजहरूलाई उक्त मार्ग प्रयोग नगर्न कडा चेतावनी दिइएको छ।

ओमानको मस्कटमा इरान र ओमानका अधिकारीहरूबीच जलयात्रा सञ्चालनलाई लिएर प्राविधिक र राजनीतिक वार्ता जारी राख्ने सहमति भएको केही घण्टा लगतै तेहरानले यो कठोर कदम चालेको हो। वार्ताका क्रममा ओमानले दुईवटा छुट्टाछुट्टै वैकल्पिक मार्गको प्रस्ताव गरे पनि इरानले त्यसलाई ठाडो अस्वीकार गरेको थियो।

यसैबीच, अमेरिकी राष्ट्रपति डोनाल्ड ट्रम्पले इरानलाई कडा चेतावनी दिँदै १,००० मिसाइलहरू “लक्ड एन्ड लोडेड” (निशाना तोकेर प्रहारका लागि तयारी) अवस्थामा राखिएको दाबी गरेका छन्। यदि इरानले आफ्नो हत्या गर्ने कुनै पनि प्रयास गरेमा थप हजारौँ मिसाइलहरू प्रहार गरिने ट्रम्पले बताएका छन्।

अर्कोतर्फ, मध्यपूर्वको यो तनावसँगै इजरायलले दक्षिणी लेबनानका विभिन्न क्षेत्रहरूमा तीव्र हवाई आक्रमण सुरु गरेको छ। लेबनानको अल-मन्सौरी क्षेत्रमा भएको आक्रमणमा परी कम्तीमा सात जना घाइते भएको स्थानीय सञ्चारमाध्यमहरूले जनाएका छन्।

विश्वको कुल पेट्रोलियम आपूर्तिको ठूलो हिस्सा ओसारपसार हुने हर्मोज जलडमरू बन्द भएसँगै विश्व बजारमा इन्धन संकट चुलिने र अमेरिका-इरान प्रत्यक्ष युद्धको खतरा बढेको भन्दै अन्तर्राष्ट्रिय समुदायले चिन्ता व्यक्त गरेका छन्।

(एजेन्सीहरूको सहयोगमा)