काठमाडौं। मिड–भ्याली इन्टरनेसनल कलेजको आयोजनामा ‘बिल्ड नेपाल ह्याकाथन २०२६’ आजदेखि काठमाडौंमा सुरु भएको छ। ‘Build Today, Transform Tomorrow’ नारासहित आयोजित दुईदिने कार्यक्रम आइतबारसम्म सञ्चालन हुनेछ।

युवामा डिजिटल नवप्रवर्तन र उद्यमशीलतालाई प्रोत्साहन गर्ने उद्देश्यले आयोजित ह्याकाथनमा २१ टोलीमा विभाजित ६० भन्दा बढी युवा सहभागी भएका छन्। १६ देखि २४ वर्ष उमेर समूहका सहभागीहरूले कृत्रिम बौद्धिकता (AI), इन्टरनेट अफ थिङ्स (IoT), रोबोटिक्स र क्लाउड कम्प्युटिङ प्रयोग गरी नेपालको वास्तविक समस्या समाधान गर्ने प्रविधिमैत्री प्रोटोटाइप विकास गर्नेछन्।

प्रतिस्पर्धा स्मार्ट सिटी, स्मार्ट कृषि, शिक्षा, पर्यटन तथा सम्पदा, साइबर सुरक्षा र डिजिटल अर्थतन्त्र गरी छ वटा विषयमा केन्द्रित हुनेछ।

कार्यक्रममा सूचना प्रविधि क्षेत्रका आठ जना विज्ञ तथा मेन्टर ले सहभागी टोलीलाई प्रत्यक्ष मार्गदर्शन गरिरहेका छन्। प्रोशोर, पिनाकिन टेक्नोलोजिज र जेनेसेलगायतका आईटी कम्पनीका विशेषज्ञहरूले प्राविधिक तथा व्यावहारिक सहयोग प्रदान गर्नेछन्।

कलेजका बीआईटी कार्यक्रम प्रमुख सुदीपलाल बजिमया ले ह्याकाथनको उद्देश्य सैद्धान्तिक ज्ञानलाई व्यावहारिक समाधानमा रूपान्तरण गर्नु रहेको बताए। उनका अनुसार उद्योगसँगको प्रत्यक्ष सहकार्यले युवालाई देशका चुनौती समाधान गर्ने नवीन प्रविधि विकासमा प्रेरित गर्नेछ।

ह्याकाथनको अन्तिम दिन सहभागी टोलीले तयार पारेका न्यूनतम व्यवहार्य उत्पादन (MVP) निर्णायकसमक्ष प्रस्तुत गर्नेछन्। मूल्याङ्कन सिटीटेकका संस्थापक साजन शर्मा, बीएलसी ग्लोबल होल्डिङ्सका प्रबन्ध निर्देशक मनिष खेम्का र आईएमई खल्तीका सहसंस्थापक अमित अग्रवाल ले गर्नेछन्।

प्रतियोगितामा ७५ हजार रुपैयाँभन्दा बढीको पुरस्कार राखिएको छ। आयोजकका अनुसार विजेताको घोषणा आइतबार साँझ गरिनेछ।

ज्ञानेश्वरस्थित मिड–भ्याली इन्टरनेसनल कलेज ले सूचना प्रविधि, व्यवस्थापन र हस्पिटालिटी विषयमा स्नातक तहका कार्यक्रम सञ्चालन गर्दै आएको छ। कलेजले उद्योगमैत्री र व्यावहारिक शिक्षामार्फत विद्यार्थीलाई प्रविधि, नेतृत्व र नवप्रवर्तनतर्फ अग्रसर गराउने लक्ष्य लिएको जनाएको छ।

Originally published on abcnews.com.np.