काठमाडौं । ‘पेप्सीकोला जाने बाटो कता हो ?’— यो प्रश्नले काठमाडौंका केही महिलाहरूका लागि ‘डर’ को पर्याय बनेको थियो । बिहान सबेरै वा राति अबेरै मोटरसाइकलमा आएका दुई ‘यात्रु’ ले बाटो सोध्ने, देखाइदिएपछि केही अगाडि जाने, फेरि फर्केर आएर लडाउने र घाँटीको सुनको सिक्री झिकेर फरार हुने— यो फर्मुला गत असारदेखि यही साउनसम्म काठमाडौंका विभिन्न स्थानमा दोहोरियो ।
तर शनिबार राति बूढानीलकण्ठको चुनिखेलमा प्रहरीसँगको ‘जम्काभेट’ ले यो ‘मेलम्ची ग्याङ’ को अन्त्य गर्यो ।
बाटो सोध्ने ‘नाटक’ र सिक्री लुट्ने ‘खेल’
गत असार १३ गते बिहान करिब ४ बजे काठमाडौं महानगरपालिका-३१ शान्तिनगरमा तरकारी पसलतर्फ जाँदै गरेकी एक महिलालाई मोटरसाइकलमा आएका दुई जनाले ‘पेप्सीकोला कता हो ?’ भनेर सोधे । बाटो देखाइदिएपछि केही अगाडि गएका उनीहरू फर्किएर आए र पछाडि बसेकाले ती महिलालाई लडाएर घाँटीमा लगाएको दुई दशमलव पाँच तोलाको सुनको सिक्री जबरजस्ती लुटेर फरार भए ।
यही ‘स्क्रिप्ट’ असार १५ गते नरेफाँट र काभ्रेपलाञ्चोकको धुलिखेलमा, र साउन ७ गते धापासी हाइटमा पनि दोहोरियो । सिसिटिभी फुटेजको सहायताले अनुसन्धान अघि बढेपछि प्रहरीले पत्तो पायो— यसको पछाडि सिन्धुपाल्चोकको मेलम्ची नगरपालिका-४ का ३४ वर्षीय कर्मा तामाङको समूह छ ।
‘जेनजी आन्दोलन’ मा हिरासतबाट भागेको नाइके
कर्मा तामाङ पेसाले सवारी चालक हुन् । तर उनी ‘पटके अपराधी’ पनि हुन् । गत भदौ २४ गते ‘जेनजी आन्दोलन’ का बेला प्रहरी वृत्त स्वयम्भूबाट हिरासतबाटै फरार भएका थिए । त्यसपछि काठमाडौंमा मोटरसाइकल चोरी र सुनको सिक्री लुटपाटमा सक्रिय भए । उनको नाममा यसअघि नौ वटा चोरी तथा डाँका मुद्दा दर्ता छन् ।
शनिबार राति करिब १०ः२५ बजे बूढानीलकण्ठ-१३ चुनिखेलमा कर्मा लुटपाटको योजना बनाइरहेको अवस्थामा प्रहरीको ‘ट्र्याकिङ’ मा परे । प्रहरीले हवाई फायर गर्दा चेतावनीको बेवास्ता गर्दै कर्माले खुकुरी प्रहार गर्न खोजे । त्यसपछि प्रहरीले घुँडामुनि गोली हानेर उनलाई नियन्त्रणमा लियो र राष्ट्रिय ट्रमा सेन्टर पुर्यायो ।
गिरोहका ‘पात्र’ र ‘भूमिका’
कर्माको समूहमा संलग्न अरू सदस्य पनि ‘पटके अपराधी’ नै रहेछन् :
-
प्रतिमान गोले (३०, काभ्रे) : नख्खु कारागारमा कैद भुक्तान गरिरहेका बेला जेनजी आन्दोलनमा भागेका । कैद भुक्तान गरेर छुटेको तीन हप्ता मात्र भएको थियो । उनको नाममा पनि डाँका चोरी मुद्दा छ ।
-
पासाङ घिसिङ (३०) : गिरोहका लागि मोटरसाइकल चोरी गरेर उपलब्ध गराउने ‘सप्लायर’ । काठमाडौंमा २० भन्दा बढी मोटरसाइकल चोरीमा संलग्न ।
-
मनोज तामाङ (३६) : सुन पसल सञ्चालक । चोरी गरिएका सुनका गरगहना गाल्ने र स्वरुप परिवर्तन गरी बिक्री गर्ने ‘एक्सपर्ट’ ।
-
आले गुरुङ (२९, कास्की) : समूहको ‘ब्याक फोर्स’ का रूपमा सहयोग गर्ने ।
‘उपत्यका बाहिर बिक्री, जिल्लामा सुरक्षित’
काठमाडौं–सिन्धुपाल्चोक गरिरहने यो समूहको रणनीति स्पष्ट थियो— काठमाडौं आउने, लुटपाट गर्ने, र जिल्ला फर्केर ‘सुरक्षित’ हुने । उनीहरूले नम्बर प्लेट परिवर्तन गर्दै दुई वटा मोटरसाइकल प्रयोग गरेका थिए । चोरी गरेका मोटरसाइकल उपत्यका बाहिर लगेर सस्तोमा बिक्री गर्ने गरेको प्रहरीले जनाएको छ ।
जिल्ला प्रहरी परिसर काठमाडौंका प्रमुख एवं प्रहरी वरिष्ठ उपरीक्षक दिलीप घिमिरेका अनुसार, उक्त समूहले बिहान सबेरै र राति अबेरै सडकमा निस्केका वृद्धा र महिलालाई बढी निशाना बनाएको पाइएको छ । ‘अपरिचित यात्रुले बाटो सोध्ने र लुटपाट गर्ने’ यो तरिका सामान्य नागरिकका लागि खतरनाक रहेको उनले बताए ।
बरामद : खुकुरी, नक्कली नम्बर प्लेट र ‘चोरीका औजार’
प्रहरीले कर्माको साथबाट एक थान मोटरसाइकल, एक थान खुकुरी, मोटरसाइकलका विभिन्न नम्बर प्लेट पाँच थान, र मोटरसाइकल चोरी गर्ने औजारहरू बरामद गरेको छ ।
प्रहरी वरिष्ठ उपरीक्षक घिमिरेले विगतका गुण्डागर्दी, चोरी, लुटपाटलगायत घटनाको ‘प्रोफाइलिङ’ र विश्लेषणका आधारमा यो समूह पक्राउ परेको जानकारी दिए । ‘उनको समूहका सदस्य पक्राउ परेपछि नाइके कर्माको बसोबास र आवतजावतको सम्भावित स्थान पहिचान गरी खोजी सुरु गरिएको थियो,’ उनले भने ।
अब ‘पेप्सीकोला’ सोध्नेहरूको डर काठमाडौंका सडकबाट हटेको छ, तर प्रहरीको चेतावनी छ— ‘बाटो सोध्ने’ बहानामा हुने अपराधबाट सचेत रहन नागरिकलाई आग्रह गरिएको छ ।
Originally published on abcnews.com.np.
प्रतिक्रिया दिनुहोस्