काठमाडौं । देशका ७२ जिल्लामा डेङ्गु संक्रमण फैलिएको छ। इपिडिमियोलोजी तथा रोग नियन्त्रण महाशाखाका अनुसार यस वर्ष पुसयता दुई हजार २५ जनामा डेङ्गु संक्रमण पुष्टि भएको छ भने दुई जनाको मृत्यु भएको छ।

कीटजन्य रोग शाखाका प्रमुख डा. गोकर्ण दाहालका अनुसार प्रदेशगत रूपमा सबैभन्दा बढी संक्रमित कोशी प्रदेशमा ५६८ जना रहेका छन्। त्यसपछि गण्डकीमा ५३२, बागमतीमा ३६५, लुम्बिनीमा ३४३, सुदूरपश्चिममा १०३, मधेशमा ७२ र कर्णालीमा ४२ जनामा संक्रमण पुष्टि भएको छ।

महाशाखाले वर्षायाममा पानी जम्ने स्थान बढेसँगै डेङ्गु फैलिने जोखिम अझ उच्च हुने भएकाले विशेष सतर्कता अपनाउन आग्रह गरेको छ। घर, आँगन तथा वरपर पानी जम्न नदिन, लामखुट्टेको टोकाइबाट बच्न पूरा बाहुला भएका लुगा लगाउन, झुल प्रयोग गर्न तथा ज्वरो आएमा तत्काल स्वास्थ्य संस्थामा पुगेर परीक्षण र उपचार गराउन महाशाखाले अनुरोध गरेको छ।

डेङ्गु नियन्त्रणका लागि साउनदेखि तीन महिने सचेतना अभियान सञ्चालन गरिएको जानकारी दिँदै डा. दाहालले सरकारी निकाय, स्थानीय तह र समुदायको सक्रिय सहभागिताबिना संक्रमण नियन्त्रण गर्न कठिन हुने बताए। महाशाखाले अभियानलाई प्रभावकारी बनाउन सबै पक्षलाई सहकार्य गर्न आग्रह गरेको छ।

Originally published on abcnews.com.np.