काठमाडौं । गृहमन्त्री सुधन गुरुङले कञ्चनपुरकी निर्मला पन्तको हत्यारा कहिले पत्ता लाग्छ भन्ने प्रश्नमा राष्ट्रियसभामै सांसदलाई प्रतिप्रश्न गरेका छन्।

बिहीबार राष्ट्रियसभाको प्रश्नोत्तर कार्यक्रममा सहभागी भएका गृहमन्त्री गुरुङले राष्ट्रियसभा सदस्य विष्णुबहादुर विश्वकर्माले निर्मला पन्त हत्याकाण्डबारे उठाएको प्रश्नको जवाफ दिने क्रममा उल्टै प्रश्न गरेका हुन्।

सांसद विश्वकर्माले, “कञ्चनपुरकी निर्मला पन्तको दिनदहाडै बलात्कारपछि हत्या भएको १० वर्षभन्दा बढी भइसक्यो। दोषी पत्ता लगाएर न्याय दिन नसक्नुको कारण के हो ? के हाम्रो राज्य संयन्त्र असफल भएको हो ?” भन्ने प्रश्न गरेका थिए।

जवाफमा गृहमन्त्री गुरुङले उक्त घटना अत्यन्त संवेदनशील भएको भन्दै बारम्बार यो विषय उठाउँदा निर्मला पन्तकी आमाको पीडामा थप चोट पुग्ने बताए।

उनले विगतका सरकारले समाधान गर्न नसकेको विषयको सम्पूर्ण जिम्मेवारी वर्तमान सरकारमाथि मात्रै नथोपर्न आग्रह गर्दै सांसद विश्वकर्मालाई नै प्रतिप्रश्न गरे।

“यो एकदमै संवेदनशील विषय हो। अहिलेको सरकारलाई मात्रै यो भारी नबोकाउनुस्,” गृहमन्त्री गुरुङले भने, “म माननीयज्यूलाई नै प्रश्न गर्न चाहन्छु– तपाईंहरू सरकारमा हुँदा हत्यारा किन पत्ता नलगाउनुभयो ?”

गृहमन्त्रीको उक्त अभिव्यक्तिपछि राष्ट्रियसभामा केहीबेर चर्चा भएको थियो।

पूरक प्रश्न सोध्ने क्रममा सांसद विश्वकर्माले मन्त्रीले आफ्नो प्रश्नको प्रत्यक्ष उत्तर नदिएको भन्दै आपत्ति जनाए। उनले सांसदलाई प्रश्न सोध्ने अधिकार संविधान र संसदीय अभ्यासले सुनिश्चित गरेको उल्लेख गर्दै मन्त्रीको दायित्व प्रश्नको उत्तर दिनु भएको बताए।

विश्वकर्माले त्यसपछि पनि निर्मला पन्त हत्याकाण्डका दोषी कहिले पत्ता लाग्छन् भन्ने प्रश्न पुनः दोहोर्‍याएका थिए।

Originally published on abcnews.com.np.