काठमाडौं, साउन २२ । संघीय संसद्अन्तर्गत प्रतिनिधिसभाको बैठक शुक्रबार अपराह्न १ बजेदेखि सुरु भएको छ। आजको बैठकमा पाँच वटा विधेयक तथा एउटा समितिको प्रतिवेदन प्रस्तुत गर्ने कार्यसूची रहेको छ।

संसद् सचिवालयले सार्वजनिक गरेको सम्भावित कार्यसूचीअनुसार, राज्य व्यवस्था तथा सुशासन समितिका सभापति हरि ढकालले ‘नेपाल विशेष सेवा ऐन, २०४२ को साविकको व्यवस्था जगाउने विधेयकसम्बन्धी समितिको प्रतिवेदन, २०८३’ सदनमा पेस गर्नुहुनेछ।

त्यसपछि प्रधानमन्त्रीको तर्फबाट कानुन, न्याय तथा संसदीय मामिलामन्त्री सोविता गौतमले ‘संवैधानिक निकायका पदाधिकारीको पारिश्रमिक, सेवाका सर्त र सुविधासम्बन्धी (पहिलो संशोधन) विधेयक, २०८३’ प्रस्तुत गर्नुहुने कार्यसूची रहेको छ।

यस्तै, उद्योग, वाणिज्य तथा आपूर्तिमन्त्री गौरी कुमारीले ‘खानी तथा खनिज पदार्थ विधेयक, २०८३’ सदनमा पेस गर्नुहुनेछ।

त्यसैगरी, महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षामन्त्री सीता बादीले ‘मानव बेचबिखन तथा ओसारपसार (नियन्त्रण) (पहिलो संशोधन) विधेयक, २०८३’ प्रस्तुत गर्ने कार्यसूची छ।

आजकै बैठकमा परराष्ट्रमन्त्री शिशिर खनालले ‘राहदानी (पहिलो संशोधन) विधेयक, २०८३’ पनि प्रतिनिधिसभामा पेस गर्नुहुनेछ।

आज प्रस्तुत हुने विधेयकहरूमध्ये संवैधानिक निकायका पदाधिकारीको सुविधा, खानी तथा खनिज क्षेत्रको कानुनी व्यवस्था, मानव बेचबिखन नियन्त्रण तथा राहदानी व्यवस्थासम्बन्धी कानुन संशोधनका प्रस्तावहरू महत्त्वपूर्ण मानिएका छन्।

Originally published on abcnews.com.np.