बोस्टन । कन्दरा ब्यान्डले दुई महिना लामो अमेरिकी कन्सर्ट यात्रा शुक्रबार राति सम्पन्न गरेको छ। अगस्ट ७ देखि सेप्टेम्बर ३० सम्म डलास, एटलान्टा, कोलोराडो, सान फ्रान्सिस्को, शिकागो लगायतका शहरहरूमा प्रस्तुति दिइएको थियो।

ब्यान्डले जारी गरेको प्रेस विज्ञप्ति अनुसार यो सांगीतिक यात्राको मुख्य उद्देश्य प्रवासमा रहेका नेपाली समुदायलाई संगीत मार्फत जोड्नु र नेपाली कला–संस्कृतिको संरक्षणबारे संवाद अघि बढाउनु हो। कन्दराले बोस्टनपछि डलास, न्युयोर्क हुँदै अन्य शहरहरूमा पनि प्रस्तुति दिएको थियो।

कन्दराका संस्थापक तथा गायक विवेक श्रेष्ठले संगीतले मान्छे र समाजमा सकारात्मक परिवर्तन ल्याउन सघाउने बताए। ‘हाम्रा लागि अमेरिका यात्रा मनोरञ्जनात्मक प्रस्तुति मात्र नभई अर्थपूर्ण गीत संगीतमार्फत विश्वभर रहेका नेपालीलाई आफ्नो भाषा, संस्कृति र जरासँग जोड्ने अभियान हो,’ उनले भने।

कन्दराको सांगीतिक प्रस्तुतिमा कला र सामाजिक उत्तरदायित्वबीच सन्तुलन कायम राखिनेछन्। विशिष्ट इन्टरनेसनलकी निर्देशक डा. प्रसिदा खनालले संगीतले मान्छे र समुदायकै सोच र व्यवहारमा सकारात्मक प्रभाव पार्ने बताइन्। ‘संगीतलाई संवाद र सामाजिक रुपान्तरणको माध्यमका रूपमा उपयोग गर्ने हाम्रो उद्देश्य हो,’ उनले थपिन्।

तीन दशक लामो यात्रा

सन् १९९२ मा पोखरामा स्थापित कन्दरा ब्यान्ड नेपाली लोकभाका, मौलिकता र अर्थपूर्ण संगीतको पर्याय मानिन्छ। लेककी हे माया, तिमी पारी, तगारोमा रुमाल राखी लगायत दर्जनौँ गीतहरू कन्दराका लोकप्रिय छन्। पछिल्लो समय ब्यान्डले आफ्नो सांगीतिक विरासतलाई आधुनिक शैलीसँग जोड्दै नयाँ पुस्तासम्म पुर्याउने प्रयास गरिरहेको छ।

Originally published on abcnews.com.np.