काठमाडौं । श्रम संस्कृति पार्टीका सांसद ध्रुवराज राईले राष्ट्रिय मुद्दामा देश एकढिक्का हुन नसक्दा विश्वभरबाट नेपाललाई नकारात्मक रूपमा हेरिएको बताउनुभएको छ। सोमबार प्रतिनिधिसभा बैठकमा बोल्दै उहाँले प्रधानमन्त्री वालेन्द्र शाह (बालेन)को सीमासम्बन्धी अभिव्यक्ति सच्याउनुपर्ने विषयसँगै राष्ट्रियताको सवालमा सबै एक ठाउँमा उभिनुपर्ने बताउनुभयो।

सांसद राईले यसअघि आफूले राष्ट्रिय मुद्दामा एकढिक्का हुन आह्वान गरेको स्मरण गर्दै त्यसो हुन नसकेकोप्रति असन्तुष्टि व्यक्त गर्नुभयो। उहाँले भन्नुभयो, “सभामुख महोदय, मैले यसअघि जुन विषयमा हामी एकढिक्का हुनुपर्छ भनेको थिएँ, त्यसमा नेपाली मात्र होइन, विश्वभरबाटै ‘कुरीकुरी’ भनिएको छ। त्यसकारण मेरो भनाइ यहीँ अन्त्य गर्छु।”

वक्तव्य दिएपछि सांसद राई तत्कालै आफ्नो आसनमा फर्किनुभएको थियो। उहाँको छोटो अभिव्यक्तिपछि केही समय प्रतिनिधिसभा बैठकमा खामोशी छाएको थियो।

सांसद राईले प्रधानमन्त्री शाहको सीमासम्बन्धी अभिव्यक्ति सच्याउनुपर्ने विषयमा समेत संकेत गर्दै राष्ट्रियतासँग जोडिएका विषयमा राजनीतिक दलहरूबीच साझा धारणा आवश्यक रहेको बताउनुभएको हो।

Originally published on abcnews.com.np.