काठमाडौँ, साउन २५ गते । ‘समृद्धिको आधार, पूर्ण समावेशी सञ्चार’ नाराका साथ तेस्रो अन्तर्राष्ट्रिय मातृभाषा पत्रकारिता सम्मेलन काठमाडौँमा सुरु भएको छ। नेपाल आदिवासी जनजाति पत्रकार महासङ्घ (फोनिज)को आयोजना तथा नेवाः पत्रकार राष्ट्रिय दबुको संयोजनमा आयोजित त्रिदिवसीय सम्मेलनको कानुन, न्याय तथा संसदीय मामिलामन्त्री सोबिता गौतमले उद्घाटन गर्नुभएको हो।

सम्मेलनमा विभिन्न राजनीतिक दलका सङ्घीय सांसद, आदिवासी जनजातिसँग सम्बन्धित सरकारी तथा गैरसरकारी संस्थाका प्रतिनिधि, नेपाल पत्रकार महासङ्घ तथा सार्क जर्नालिष्ट फोरमका प्रतिनिधिसहित नेपालका करिब ३०० पत्रकार सहभागी छन्। यस्तै, भारत, बङ्गलादेशलगायत विभिन्न मुलुकबाट ३५ पत्रकार प्रत्यक्ष सहभागी भएका छन् भने २७ मुलुकका पत्रकार श्रव्यदृश्य माध्यमबाट सम्मेलनमा जोडिएका छन्।

त्रिदिवसीय सम्मेलनमा आदिवासी कृषि, खाद्य सुरक्षा, परम्परागत ज्ञान तथा वनसँगको सम्बन्ध, सरकारी सञ्चारमाध्यममा मातृभाषा पत्रकारिताको अवस्था, निजी सञ्चारमाध्यममा मातृभाषाको प्रयोग तथा मातृभाषा पत्रकारिता, जलवायु परिवर्तन, वन व्यवस्थापन र राज्यका नीति तथा अभ्यासमा आदिवासी समुदायलगायत विषयमा विषयविज्ञ तथा पत्रकारबीच छलफल हुने आयोजकले जनाएको छ।

सम्मेलनले मातृभाषामा हुने पत्रकारितालाई थप सशक्त बनाउँदै सञ्चार क्षेत्रमा समावेशिता र विविधताको प्रवर्द्धनमा योगदान पुर्‍याउने अपेक्षा गरिएको छ।

Originally published on abcnews.com.np.