काठमाडौँ । परराष्ट्रसचिव अमृतबहादुर राईले नेपाल ‘एक चीन सिद्धान्त’प्रति दृढ रहेको र नेपाली भूमिलाई चीनको हितविरुद्ध प्रयोग हुन नदिने प्रतिबद्धता दोहोर्‍याउनुभएको छ।

नेपाल–चीन कूटनीतिक सम्बन्धको ७१औँ वार्षिकोत्सव तथा २०२६ नेपाल–चीनमैत्री लघु भिडियो प्रतियोगिताको पुरस्कार वितरण समारोहमा बिहीबार सम्बोधन गर्दै उहाँले दुई देशबीचको सम्बन्ध पञ्चशीलका सिद्धान्त, असल छिमेकीपन, पारस्परिक साझेदारी, सहकार्य, समानता तथा एकअर्काको भावना र संवेदनशीलताप्रतिको सम्मानमा आधारित रहेको बताउनुभयो।

परराष्ट्रसचिव राईले ७१औँ वार्षिकोत्सवलाई कूटनीतिक पात्रोको नियमित घटना मात्र नभई नेपाल–चीनबीचको चिरस्थायी सम्बन्धको प्रमाणका रूपमा व्याख्या गर्नुभयो।

उहाँका अनुसार सात दशकको अवधिमा नेपाल–चीन सम्बन्ध परम्परागत मित्रता र सांस्कृतिक आदानप्रदानबाट साझा समृद्धिका लागि बृहत् साझेदारीमा विस्तार भएको छ। उच्चस्तरीय भ्रमण तथा विभिन्न तहका आदानप्रदानले द्विपक्षीय सम्बन्धका सबै क्षेत्रमा थप गतिशीलता ल्याएको उहाँले बताउनुभयो।

नेपाल र चीनले नियममा आधारित विश्वव्यवस्था र बहुपक्षीयताप्रति प्रतिबद्धता जनाउँदै साझा हितका विषयमा विभिन्न बहुपक्षीय मञ्चमा सहकार्य गर्दै आएको पनि उहाँले उल्लेख गर्नुभयो।

चीनको विकासबाट सिक्न चाहन्छ नेपाल

परराष्ट्रसचिव राईले चीनले हासिल गरेको आर्थिक विकासबाट नेपालले सिक्दै दुई देशबीचको आर्थिक सहकार्यलाई थप गहिरो बनाउन चाहेको बताउनुभयो।

विगत सात दशकमा व्यापार, लगानी, पूर्वाधार, पर्यटन, शिक्षा, संस्कृति तथा जनस्तरको सम्बन्धमा उल्लेख्य विस्तार भएको उहाँको भनाइ छ।

नेपालले ट्रान्स–हिमालयन बहुआयामिक सम्पर्क सञ्जाल र त्यसको शीघ्र कार्यान्वयनलाई विशेष महत्व दिएको पनि उहाँले बताउनुभयो।

‘नेपाल–चीन राजनीतिक विश्वास अझ गहिरिएको छ’

कार्यक्रममा चिनियाँ राजदूत चाङ माओमिङले दुई देशबीच कूटनीतिक सम्बन्ध स्थापना भएदेखि अन्तर्राष्ट्रिय परिस्थितिमा परिवर्तन आए पनि नेपाल र चीनले एकअर्कालाई सम्मान, विश्वास र समर्थन गर्दै आएको बताउनुभयो।

नेपालमा नयाँ सरकार गठन भएयता दुई देशबीचको राजनीतिक पारस्परिक विश्वास अझ गहिरिएको र ‘बेल्ट एन्ड रोड सहकार्य’ ठोस परिणामसहित अघि बढिरहेको उहाँको दाबी छ।

राजदूत माओमिङले व्यापार, अर्थतन्त्र, पूर्वाधार, सम्पर्क सञ्जाल, ऊर्जा, कृषि, शिक्षा, स्वास्थ्य तथा पर्यटनलगायत क्षेत्रमा दुई देशबीच नयाँ प्रगति भइरहेको बताउनुभयो। ठूलो सङ्ख्यामा चिनियाँ पर्यटक नेपाल भ्रमणमा आउने गरेको उल्लेख गर्दै उहाँले जनस्तरको आदानप्रदानलाई नेपाल–चीन सम्बन्धको वास्तविक आधारका रूपमा व्याख्या गर्नुभयो।

सन् २०१९ मा चिनियाँ राष्ट्रपति सी चिनफिङको नेपाल भ्रमणका क्रममा दुई देशबीचको सम्बन्ध ‘विकास र समृद्धिका लागि दीर्घकालीन रणनीतिक साझेदारी’को स्तरमा पुगेको उहाँले स्मरण गर्नुभयो।

पारस्परिक सम्मान र लाभमा आधारित सम्बन्धमा जोड

राजदूत माओमिङले चीनले शान्तिपूर्ण विकासको बाटो रोजेको बताउँदै सबै देशले एकअर्कालाई सम्मान, समान व्यवहार र शान्तिपूर्ण सहअस्तित्वको सिद्धान्त पालना गर्नुपर्ने धारणा राख्नुभयो।

चीन नेपालसँग पारस्परिक सम्मान र लाभमा आधारित सम्बन्धलाई थप अघि बढाउन तयार रहेको बताउँदै उहाँले दुई देशबीच भएका समझदारी कार्यान्वयन गरी साझा भविष्य निर्माणलाई प्राथमिकता दिने उल्लेख गर्नुभयो।

डिजिटल युगमा श्रव्यदृश्य सामग्रीले भाषा, दूरी र संस्कृतिका सीमासमेत पार गर्दै दुई देशका जनतालाई जोड्न सक्ने उहाँले बताउनुभयो।

नेपाल–चीनमैत्री लघु भिडियो प्रतियोगिताका विजेता पुरस्कृत

कार्यक्रममा २०२६ नेपाल–चीनमैत्री लघु भिडियो प्रतियोगिताका विजेतालाई पुरस्कार वितरण गरिएको थियो। प्रतियोगितामा ठूलो सङ्ख्यामा भिडियो प्राप्त भएको र सहभागीले नेपाल–चीन सम्बन्धका विभिन्न आयाम तथा दुई देशका सुन्दर दृश्य समेटेको भन्दै प्रशंसा गरिएको थियो।

प्रतियोगितामा दिपेश स्याङ्दानले प्रथम पुरस्कारसहित ५० हजार रुपैयाँ प्राप्त गर्नुभएको छ।

कार्यक्रममा विभिन्न राजनीतिक दलका नेता, कूटनीतिज्ञ, व्यवसायी तथा विभिन्न क्षेत्रका व्यक्तित्वहरूको उपस्थिति रहेको थियो।

Originally published on abcnews.com.np.