स्याङ्जा । स्याङ्जाको पुतलीबजार नगरपालिका–१ स्थित अरौदिखोलाले मोटरसाइकलसहित बगाएर बेपत्ता बनाएका २१ वर्षीय युवक मृत अवस्थामा फेला परेका छन्।

बिहीबार राति करिब १०ः२० बजे पुतलीबजार नगरपालिका–३ बाडखोलाका सलिम मगरलाई ग ११ प ८१८३ नम्बरको मोटरसाइकलसहित अरौदिखोलाले बगाएर बेपत्ता बनाएको थियो।

मगरको खोजीका लागि सिहसार्दुल गुल्म स्याङ्जा, जिल्ला प्रहरी कार्यालय स्याङ्जा तथा सशस्त्र प्रहरी बल नेपाल ३० नं. गुल्म वालिङबाट संयुक्त टोली परिचालन गरिएको थियो।

खोजीका क्रममा शुक्रबार दिउँसो करिब ३ः१० बजे पुतलीबजार नगरपालिका–१३ गैरीजागरस्थित आँधीखोलामा मगरको शव फेला परेको प्रहरीले जनाएको छ।

खोजी टोलीले शव खोलाबाट बाहिर निकाली आवश्यक मुचुल्का तयार गरी पोस्टमार्टमका लागि जिल्ला अस्पताल स्याङ्जा पठाएको छ।

घटनाबारे थप अनुसन्धान भइरहेको प्रहरीले जनाएको छ।

Originally published on abcnews.com.np.