काठमाडौँ । स्वास्थ्य बीमा कार्यक्रमअन्तर्गत विभिन्न जिल्लाका ३७६ वटा स्वास्थ्य संस्थालाई तीन अर्ब ५६ करोड आठ लाख ९४ हजार ९६० रुपैयाँ ६९ पैसा भुक्तानी गरिएको छ।

स्वास्थ्य मन्त्रालयका अनुसार २०८२ माघ र फागुन महिनामा प्रदान गरिएको स्वास्थ्य सेवाबापत सेवा प्रदायक स्वास्थ्य संस्थाहरूलाई उक्त रकम भुक्तानी गरिएको हो।

भुक्तानी पाउने संस्थामा सरकारी अस्पताल, प्राथमिक स्वास्थ्य केन्द्र, नगर अस्पताल, आँखा अस्पतालका साथै निजी तथा शिक्षण अस्पतालसमेत रहेका छन्।

दुर्गम क्षेत्रका स्वास्थ्य संस्था पनि समेटिए

भुक्तानी विवरणमा ठूला अस्पतालसँगै दुर्गम तथा ग्रामीण क्षेत्रमा सञ्चालित प्राथमिक स्वास्थ्य केन्द्र, आधारभूत अस्पताल र जिल्ला अस्पताल लगायतका स्वास्थ्य संस्था पनि समेटिएका छन्।

स्वास्थ्य बीमा कार्यक्रमअन्तर्गत सेवा प्रदान गरेका संस्थाहरूले पेस गरेका दाबीको रुजु तथा मूल्याङ्कन गरी स्वीकृत विवरणका आधारमा रकम भुक्तानी गरिएको मन्त्रालयले जनाएको छ।

स्वास्थ्य संस्थालाई समयमै सेवा शुल्क भुक्तानी हुँदा स्वास्थ्य बीमा कार्यक्रमअन्तर्गत बीमितलाई सेवा उपलब्ध गराउने संस्थाहरूको वित्तीय व्यवस्थापनमा समेत सहजता हुने अपेक्षा गरिएको छ।

Originally published on abcnews.com.np.