काठमाडौं । नेपाली कांग्रेसका नेता एनपी साउदले पार्टीको १४औँ महाधिवेशनबाट निर्वाचित कार्यसमिति पुनर्स्थापित नभएसम्म कांग्रेसभित्र वास्तविक एकता सम्भव नहुने बताएका छन्।

शुक्रबार संस्थापनइतर पक्षले आयोजना गरेको राष्ट्रिय भेलालाई सम्बोधन गर्दै साउदले विशेष महाधिवेशनमा सहभागी भएका र सहभागी नभएका सबै नेता–कार्यकर्ता १४औँ महाधिवेशनमा एउटै संरचनाभित्र रहेको स्मरण गराए।

“१४औँ महाधिवेशन पुनर्स्थापित नभएसम्म कांग्रेसको एकता हुन सक्दैन,” साउदले भने, “१४औँ महाधिवेशन यस्तो थियो कि जहाँ विशेष महाधिवेशनमा भाग लिएका मान्छे पनि र भाग नलिएका मान्छे पनि एकै थलोमा थियौँ।”

उनले कांग्रेसको वर्तमान विवाद केवल राजनीतिक मतभेदमा सीमित नरहेको भन्दै यसको कानुनी पक्षसमेत जोडिएको बताए। विशेष महाधिवेशनको वैधानिकतासम्बन्धी मुद्दा सर्वोच्च अदालतमा विचाराधीन रहेकाले अदालतको पुनरावलोकन प्रक्रियाअघि राजनीतिक रूपमा एकताको वातावरण बनाउन कठिन हुने उनको भनाइ छ।

“हामी अदालत गइसकेपछि अध्ययन गरेर पुनरवलोकनको निस्सा दिएको छ। अब जसले जे भने पनि पुनरवलोकनअघि एकता हुन असाध्यै गाह्रो छ,” उनले भने।

अदालतको निर्णयपछि मात्र राजनीतिक निकास

साउदका अनुसार सर्वोच्च अदालतमा अहिले दुईवटा विषयमा पुनरावलोकनको प्रक्रिया अघि बढिरहेको छ। ती मुद्दाको टुंगो लागेपछि मात्रै कांग्रेसको आधिकारिक नेतृत्व र पार्टी संरचनाबारे स्पष्टता आउने उनको दाबी छ।

“१४औँ महाधिवेशनमा शेरबहादुर देउवाको सभापतित्वको समिति बहाल रहने कि विशेष महाधिवेशनले मान्यता पाउने ? यसको निक्र्योल भइसकेपछि मात्रै पार्टी एकताको राजनीतिक निर्णय हुन्छ,” साउदले भने।

उनले अदालतको प्रक्रियालाई बेवास्ता गरेर राजनीतिक सहमतिमात्रै खोज्दा पार्टीभित्रको मूल विवाद समाधान नहुने संकेत गरे।

‘संस्थापनले सार्थक संवाद गरेन’

साउदले पार्टी एकताका लागि आफूहरूले पहल गरिरहेको भए पनि संस्थापन पक्षले सार्थक संवादका लागि अग्रसरता नदेखाएको आरोप लगाए।

उनका अनुसार व्यक्तिगत रूपमा भेटघाट र छलफल भए पनि पार्टीभित्रको विवाद समाधानका लागि आवश्यक गम्भीर राजनीतिक बहस र औपचारिक संवाद हुन नसकेको छ।

“पार्टी मिलाउने, एकजुट बनाउने कुरामा कुनै किसिमको पहलकदमी लिनुभएन। व्यक्तिगत भेटघाट र छलफल गरे पनि सार्थक बहसका लागि टेबलमा आउनुभएन,” साउदले भने।

कांग्रेसभित्र विशेष महाधिवेशनपछि नेतृत्वको वैधानिकता, पार्टी संरचना र आगामी महाधिवेशनलाई लिएर विवाद चर्किरहेका बेला साउदको यस्तो अभिव्यक्ति आएको हो। उनको भनाइले पार्टी एकताको प्रश्न अब राजनीतिक सहमतिसँगै सर्वोच्च अदालतको पुनरावलोकन प्रक्रियासँग समेत प्रत्यक्ष रूपमा जोडिएको संकेत गरेको छ।

Originally published on abcnews.com.np.