काठमाडौं । चितवनको इच्छाकामना गाउँपालिका–५, सिमलधारास्थित पृथ्वीराजमार्गमा गएको पहिरो हटाएपछि सडक आज बिहानदेखि दुईतर्फी सञ्चालनमा आएको छ।

जिल्ला प्रहरी कार्यालय चितवनका अनुसार शनिबार राति १०:२५ बजे रूखसहितको पहिरो खसेपछि पृथ्वीराजमार्ग पूर्ण रूपमा अवरुद्ध भएको थियो। सुरक्षाकर्मी र स्थानीयको प्रयासपछि आइतबार बिहान ६:१५ बजेसम्म पहिरो पन्छाएर सडक सुचारु गरिएको हो।

सडक खुलेसँगै नारायणगढ–काठमाडौं आवतजावत गर्ने सवारीसाधनको यातायात सामान्य भएको प्रहरीले जनाएको छ। पहिरोका कारण रातिदेखि सडक अवरुद्ध हुँदा केही यात्रु तथा सवारीसाधन बाटोमै रोकिएका थिए।

पहिरो खसेलगत्तै प्रहरी र स्थानीयवासीले सडक खुलाउने प्रयास थालेका थिए। तर, पहिरो ठूलो मात्रामा खसेकाले तत्काल हटाउन कठिन भएको प्रहरीले जनाएको छ।

इच्छाकामना गाउँपालिकाका वडाध्यक्षसमेत घटनास्थलमा पुगेर पहिरो हटाउने कार्यमा समन्वय तथा सहयोग गरेका थिए। आइतबार बिहान थप जनशक्ति र आवश्यक उपकरण परिचालन गरी पहिरो पूर्ण रूपमा हटाइएपछि राजमार्गमा यातायात सहज बनेको प्रहरीले जनाएको छ।

Originally published on abcnews.com.np.